უკრაინის პრეზიდენტი ვლადიმერ ზელენსკი შეიარაღებული პირის მიერ ავტობუსის გატაცების ფაქტს ეხმიანება და აცხადებს, რომ სიტუაციის მსხვერპლის გარეშე მოგვარების მიზნით ყველაფერი კეთდება.
„საგანგაშო ინფორმაციაა ლუცკიდან. დილით, 9:25 საათზე პოლიციის განყოფილებაში მამაკაცმა დარეკა და თქვა, რომ ავტობუსი გაიტაცა, ტრანსპორტში მყოფი ადამიანები კი, მძევლებად აიყვანა. ოპერაცია „ბუმერანგი“ ამ წუთებში მიმდინარეობს. ყველაფერი კეთდება, რომ სიტუაცია მსხვერპლის გარეშე დარეგულირდეს“, – წერს ვლადიმერ ზელენსკი.
შეგახსენებთ, უკრაინის ქალაქ ლუცკში შეიარაღებულმა პირმა ავტობუსი გაიტაცა და მგზავრები მძევლად აიყვანა.
უკრაინული მედიის ინფორმაციით, გამტაცებელმა ვიდეოჩაწერა და სოციალურ ქსელ „ტვიტერში“ პოსტი გამოაქვეყნა. მამაკაცი, რომელიც თავის თავს მაქსიმ პლოხის უწოდებს, ითხოვს, მაღალჩინოსნებმა ვიდეომიმართვა ჩაწერონ, სადაც იტყვიან, რომ „კანონიერი ტერორისტები“ არიან. კერძოდ, ის აღნიშნული შინაარსის ვიდეომიმართვის გავრცელებას სასამართლოების, სამინისტროების, პროკურატურის, პარლამენტისა და ეკლესიის მეთაურებისგან ითხოვს.
ის აცხადებს, რომ ერთი ასაფეთქებელი მოწობილობა ხალხმრავალ ადგილზე აქვს დამალული.
“ინტერპრესნიუსი”