გაეროს ცნობით, ყოველთვიურად პანდემიასთან დაკავშირებული შიმშილის გამო 10 ათასზე მეტი ბავშვი იღუპება. ამის შესახებ AFP წერს.
გამოცემის ცნობით, კორონავირუსის გავრცელების პრევენციის მიზნით დაწესებული შეზღუდვები მსოფლიოს სხვადასხვა კუთხეში არსებულ რთულ ეკონომიკურ და სოციალურ მდგომარეობას უფრო ავრცელებს. კერძოდ, მცირე ფერმების მეპატრონეებს მოსავალი ბაზრებზე ვეღარ გააქვთ, სოფლები კი საკვებისა და სამედიცინო დახმარებას ვერ იღებენ.
ამასთან, ყოველთვიურად 550 ათას ბავშვს ატროფია უვითარდება, რაც კიდურების დასუსტებასა და მუცლის ამობერვით გამოიხატება. სპეციალისტები აღნიშნავენ, რომ ეს ბავშვის ფსიქიკაზე სერიოზულ ნეგატიურ გავლენას ახდენს, შედეგად ინდივიდუალური ტრაგედია შესაძლოა მთელი თაობის კატასტროფაში გადაიზარდოს.
გაეროს კვლევის მიხედვით, რომელიც ჟურნალ Lancet-ში გამოქვეყნდება, ასეთი ვითარება პანდემიის პირველი წლის განმავლობაში გაგრძელდება, შემდეგ კი ვითარება შეიძლება უფრო გამწვავდეს. ამიტომ ორგანიზაცია საერთაშორისო თანამეგობრობას მოქმედებისკენ მოუწოდებს.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.
“იმედი”