ჟურნალისტი და ტელეწამყვანი ინგა გრიგოლია ტელეკომპანია დეპუტატ თეა წულუკიანის მიერ “მთავარი არხის” დირექტორის, ნიკა გვარამიას ტელეფონის ნომრის გასაჯაროვების ფაქტს სოციალურ ქსელში ეხმაურება და წერს, რომ ეს არის ღიად ჩადენილი დანაშაული.
“რა არ მინახავს ამ ქვეყნად, მაგრამ დეპუტატს ,თანაც იუსტიციის ყოფილ მინისტრს,თანაც სტრასბურგში ნამუშევარს, ასე სახალხოდ გაებედოს ადამიანთან შეუთანხმებლად მისი ტელეფონის ნომრის გამოცხადება, თანაც პოლიტიკური ოპონენტის-პირველად ვნახე.
ანუ, ვისაც არ გევასებათ გვარამია, დაურეკეთ და აგინეთო რა…. აი, ასე ახალისებენ აგრესიას და ადამიანის განადგურების კამპანიას ამ ქვეყანაში, ბოლომდე ვერ ვიჯერებდი, რომ ეს გაბედა. საუკეთესო მაგალითი აჩვენა დღეს წულუკიანმა, როგორი არ უნდა იყოს პოლიტიკოსი, რაც არ უნდა მიუღებელი იყოს შენთვის პოლიტიკური ოპონენტი, ტელეფონის ნომერი გამოუცხადო და მიუსიო შენი მხარდამჭერები, არის ღიად ჩადენილი დანაშაული ადამიანის უფლებებზე თავზე გადავლით” – წერს გრიგოლია.
ცნობისთვის, პარტია “მოქალაქეების” ლიდერმა, ალეკო ელისაშვილმა დღეს პარლამენტის პლენარულ სხდომაზე სიტყვით გამოსვლისას განაცხადა, რომ არჩევნები, რა თქმა უნდა გაყალბდა, თუმცა ის პარლამენტში ხალხის პრობლემების მოსაგვარებლად შევიდა. მან საკუთარი ტელეფონის ნომერი გამოაცხადა და თქვა, რომ მოქალაქეების ნებისმიერ ზარს უპასუხებს.
ელისაშვილს თეა წულუკიანმა უპასუხა და მას ნიკა გვარამიას ტელეფონის ნომრის ჩაწერა შესთავაზა, რათა მისგან მიიღოს დირექტივა იმის შესახებ, თუ რა ილაპარაკოს პარლამენტში. მან ნიკა გვარამის ტელეფონის ნომერი სხდომაზე საჯაროდ გამოაცხადა. ამასთან, წულუკიანი დაინტერსდა, თუ არჩევნები გაყალბდა, მაშინ რას აკეთებს ელისაშვილი პარლამენტში.
წულუკიანის განცხადებას მალევე გამოეხმაურა ნიკა გვარამია.როგორც “მთავარი არხის” დამფუძნებელი აცხადებს, მის ტელეფონზე უცხო ნომრებიდან ზარები არ წყდება. გვარამია სახალხო დამცველსაც მიმართავს იმის დასადგენად, რამდენად სწორია მისი პირადი ინფორმაციის გასაჯაროვება.