საქართველო რუსეთის არამეგობრული ქვეყნების ათეულშია – გამოკითხვა რუსეთში

რუსეთში სამ ყველაზე მეგობრულ ქვეყნად ამჟამად ბელარუსი, ჩინეთი და ყაზახეთი სახელდება.

გამოკითხვის მიხედვით, 58% ბელარუსს რუსეთის მეგობარ ქვეყნად ასახელებს. ათეულში ასევე შედის სომხეთი, ინდოეთი, აზერბაიჯანი, ყირგიზეთი, სირია, გერმანია და კუბა.

თავის მხრივ, რუსები შეერთებულ შტატებს რუსეთის მიმართ ყველაზე არამეგობრულ სახელმწიფოდ მიიჩნევენ- გამოკითხულთა 66%-მა ასე უპასუხა. მეორე ადგილზეა უკრაინა (პასუხების 40%), მესამეზე დიდი ბრიტანეთი- (28%).

არამეგობრული დამოკიდებულების ათეულში მოხვდნენ ლატვია (21%), პოლონეთი (21%), ლიეტუვა (20%), გერმანია (16%), საქართველო (15%), ჩეხეთი (9%), ესტონეთი (9%). მთელი სადამკვირვებლო პერიოდის განმავლობაში ჩეხეთი პირველად შევიდა არამეგობრული ქვეყნების ათეულში. ასევე აღსანიშნავია, რომ საქართველოს მაჩვენებელი მცირედით შეიცვალა (გასულ წელს ეს იყო 16%).

სოციოლოგები აღნიშნავენ, რომ რუსების დამოკიდებულება შეერთებული შტატების მიმართ ბოლო რამდენიმე თვის განმავლობაში მკვეთრად გაუარესდა: თუ მარტში რუსეთის მოქალაქეთა 42% თვლიდა ამერიკას „ცუდ“ ქვეყნად, მაისში – უკვე 54%. გააქტიურდა რუსების ნეგატიური დამოკიდებულება ევროკავშირის ქვეყნების მიმართ, რომლებმაც 2019 წლის გაზაფხულიდან მაქსიმალურ მაჩვენებლებს მიაღწიეს.

დაბოლოს, ლევადას ცენტრის კვლევის თანახმად, გამოკითხულთა 83% დარწმუნებულია, რომ რუსეთს მტრები ჰყავს.