საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა ეკატერინე ტიკარაძემ განმარტა, რა პირობებით შეძლებენ მოქალაქეები კორონავირუსის საწინააღმდეგო ვაქცინის დამატებით, მესამე დოზის მიღებას.
„ჩვენს მოქალაქეებს ბუსტერ დოზების გაკეთება უკვე შეეძლებათ მას შემდეგ, რაც მეორე აცრიდან 6 თვეს აითვლიან. ეს ეხება „ფაიზერის ვაქცინას. რაც შეეხება სხვა ვაქცინებით ვაქცინირებულებს – მათ მიეცათ ხელმისაწვდომობა, გაიკეთონ კუთვნილი ბუსტერ დოზა. რაც შეეხება ქრონიკული დაავადებების მქონე პირებს; მკურნალი ექიმის დასკვნისა და იმ ინფორმაციის საფუძველზე, რომელიც პაციენტს თავად აქვს, არსებული ბაზიდან, რომელიც სამინისტროს აქვს, შესაძლებელი იქნება გაირკვეს, თუ რომელი პაციენტი საჭიროებს დამატებით, ბუსტერ დოზას, რომლის შესახებაც საბჭომ გუშინ მიიღო გადაწყვეტილება“, – აღნიშნა ეკატერინე ტიკარაძემ.
7 ოქტომბერს, იმუნიზაციის საბჭომ მეორე აცრის გაკეთებიდან 6 თვის შემდეგ ე.წ. ბუსტერ დოზის გამოყენებას გარკვეულ შემთხვევებში მხარი დაუჭირა.
ამ დროისთვის საქართველოში კორონავირუსის 628 719 შემთხვევაა დადასტურებული. მათ შორის გამოჯანმრთელდა 597 654, გარდაიცვალა 9 192 პაციენტი.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
საქართველოში „ასტრაზენეკათი“ ვაქცინაცია 2021 წლის 15 მარტიდან დაიწყო, „ფაიზერით“ კი 30 მარტიდან. 3 აპრილს ქვეყანამ „სინოფარმის“ ვაქცინის 100 ათასი დოზა მიიღო. ამ ვაქცინის გამოყენება 4 მაისიდან დაიწყო, „სინოვაკით“ იმუნიზაცია კი 24 მაისიდან.
“იმედინიუსი”