ეს არის გარკვეული იმიტაციები, შეიძლება ითქვას, რიტუალური ცეკვებია. ამ ოპოზიციამ ჭკუა საერთოდ ვერ ისწავლა, – ასე ეხმაურება ექსპერტი გია ხუხაშვილი „პალიტრანიუსის” გადაცემაში „360 გრადუსი” საპარლამენტო უმრავლესობისა და ოპოზიციონერი დეპუტატების შეხვედრას სასამართლო სისტემასთან დაკავშირებით.
გია ხუხაშვილის თქმით, ერთადერთი, რაზეც შეიძლება ოპოზიცია ხელისუფლებას მოელაპარაკოს, სასამართლო სისტემის ფუნდამენტური რეფორმაა.
„დასავლეთის მხრიდან არის ფუნდამენტური მოთხოვნა სასამართლო რეფორმაზე, გამომდინარე იქიდან, რომ ისინი მშვენივრად ხედავენ, რომ ნდობა სასამართლო სისტემის მიმართ არის ძალიან დაბალი და აქედან გამომდინარე არის პრობლემების მთელი წყება.
რეალურად ეს არის შემთხვევა, როცა ავთვისებიან სიმსივნესთან, მეოთხე სტადიასთან გვაქვს საქმე, სადაც უბრალო თერაპიით აქ ვერაფერი ვერ გადაწყდება. ბულდოზერით უნდა გადავუაროთ ამ სასამართლო სისტემას.
ადამიანები, რომლებიც საკონტროლო პაკეტს ფლობენ სასამართლოში და რომლებიც აკონტროლებენ არა მარტო სასამართლო სისტემას, არამედ იუსტიციის საბჭოსაც, ეს ადამიანები თავის დროზე პოლიტიკური ვერდიქტის გამოტანაში იყვნენ შემჩნეული. კოლექტიურ მურუსიძეზე ვსაუბრობ. როდესაც ეს ადამიანები უკვე იქ არიან, ჩვენ ახლა ამის შემდეგ სულ ანგელოზები რომ შევიყვანოთ სასამართლოში ამით რამეს ეშველება? ავგიას თავლაში ვინ არ უნდა შეიყვანო, სულ ფრთიანი ანგელოზიც, აქოთდება ისიც ცოტა ხანში იმიტომ, რომ ყარს იქაურობა.
ერთადერთი რაზეც შეიძლება მოლაპარაკება ეს არის ფუნდამენტური რეფორმა. რეპუტაციულ საცერში უნდა გატარდეს ყველა. მათ შორის მოქმედი მოსამართლეებიც”, – განაცხადა გია ხუხაშვილმა.