რუსთავის საპატრულო პოლიციას ახალი ავტომობილები გადაეცა.
საპატრულო პოლიციის დეპარტამენტის დირექტორმა, ვაჟა სირაძემ საპატრულო პოლიციის დეპარტამენტის ქვემო ქართლის მთავარ სამმართველოს ახალი, სედანის ტიპის, ჰიბრიდულძრავიანი 10 ავტომობილი გადასცა.
სამინისტროში საპოლიციო ინფრასტრუქტურის გაუმჯობესების მიზანია საპოლიციო საქმიანობის ეფექტიანობის ამაღლება და პოლიციელებისთვის უკეთესი, კომფორტული სამუშაო პირობების შექმნა.
ვაჟა სირაძემ საპატრულო პოლიციის დეპარტამენტის ქვემო ქართლის მთავარი სამმართველოს თანამშრომლებთან სამუშაო თათბირი გამართა, მათ დაგეგმილი და მიმდინარე პროექტების შესახებ მიაწოდა ინფორმაცია და სამუშაო პროცესთან დაკავშირებით შესაბამისი დავალებები მისცა. ვაჟა სირაძე ასევე, საპატრულო პოლიციის დეპარტამენტის რუსთავის ერთიანი მომსახურების ცენტრში იმყოფებოდა და თანამშრომლებს გაესაუბრა.
აღსანიშნავია, რომ ახალი ავტომანქანები არის ეკონომიური, რაც შეამცირებს ადმინისტრაციულ ხარჯებს, კერძოდ, საწვავისა და სერვისის ხარჯს. ამავდროულად, ახალ ავტომობილებს მინიმალური გამონაბოლქვი აქვს და ეკოლოგიურად სუფთა ტრანსპორტია. ბათუმისა და ქობულეთის შემდეგ, ეკოლოგიურად უსაფრთხო და თანამედროვე საპოლიციო ტრანსპორტი რუსთავშიც სრულად ჩაანაცვლებს საპატრულო პოლიციის მხოლოდ საწვავზე მომუშავე მანქანებს.
შინაგან საქმეთა სამინისტრო თავის ავტოპარკს რეგულარულად აახლებს. გასულ წელს, პოლიციის დანაყოფების ავტოპარკი 700-მდე ახალი ავტომობილით განახლდა.
ინფორმაციას საქართველოს შინაგან საქმეთა სამინისტრო ავრცელებს.
წყარო: 1tv.ge