მეწარმე მეუღლე, სოლიდური მემკვიდრეობა და პრემიერის მრჩევლობიდან აღებული 36 ათასი – ირაკლი სესიაშვილის ოჯახი, ქონებრივი მდგომარეობა და მრავალფეროვანი ბიოგრაფია.
ირაკლი სესიაშვილი ერთ-ერთია პოლიტიკური პირებიდან, ვინც ყველაზე ნაკლებად საუბრობს პირად ცხოვრებაზე. არასოდეს დაწერილა მისი მეუღლისა შვილების შესახებ მედიაში.
პროფესიით ფილოლოგი, ჟურნალისტი და სამოქალაქო უფლებების დამცველი სესიაშვილი პოლიტიკაში 2012 წელს მოვიდა, როდესაც ხელისუფლების მმართველობა “ქართულმა ოცნებამ” ჩაიბარა.
ირაკლი სესიაშვილს საკმაოდ მრავალფეროვანი ბიოგრაფია აქვს – 1995 წელს სესიაშვილმა დაამთავრა ჯავახიშვილის უნივერსიტეტის დასავლეთ ევროპის ფაკულტეტი. 1996 წელს ჰაიდელბერგის უნივერსიტეტის გერმანისტიკის ფაკულტეტი, 1997 წელს კი ჰამბურგის უნივერსიტეტის ჟურნალისტიკის ფაკულტეტი.
1995/1996 წლებში იყო გერმანული ჟურნალ „Kaukasische Post“-ის რედაქტორი. შემდეგ მუშაობდა ჟურნალ “საქართველოს ახალგაზრდა იურისტთა ასოციაციის” რედაქტორად, იყო ასევე სახელმწიფო უნივერსიტეტის გერმანული ენის ლექტორი…
სესიაშვილი არის რამდენიმე წიგნის ავტორი, ესენია: “ქართული ჯარი კანონსა და სინამდვილეს შორის”, “წვევამდელთა უფლებები”, “ჯარისკაცთა უფლებები”, “ოფიცერთა უფლებები”, “ჯარი და დემოკრატია”, “სამხედრო მომსახურეთა უფლებები და ფუნდამენტური თავისუფლებანი ეუთოს ქვეყნებში”.
2012-2020 წლებში იყო საქართველოს პარლამენტის წევრი. 2021 წლის 13 მაისს დაინიშნა საქართველოს პრემიერ-მინისტრის მრჩევლად თავდაცვისა და უსაფრთხოების საკითხებში.
ოჯახი:
ირაკლი სესიაშვილის მეუღლე თინათინ კიკილაშვილია. წყვილს ორი ვაჟი ჰყავს – დავით და ლაშა სესიაშვილები. დავით სესიაშვილი დაოჯახებულია, ჰყავს მეუღლე ელენე გვასალია. წყვილს ერთი შვილი ჰყავს. დავით სესიაშვილი სუს-ში იყო დასაქმებული. ირაკლი სესიაშვილის 2020 წლის დეკლარაციიდან ირკვევა, რომ მისმა ვაჟმა სახელმწიფო უსაფრთხოების სამსახურში მუშაობისას 2019 წელს 10 405 ლარი მიიღო.
სესიაშვილის მეუღლე სამეწარმეო საქმიანობით არის დაკავებული. ასევე მისი სოციალური ქსელიდან ვიგებთ, რომ კიკილაშვილი მხატვრობით არის გატაცებული. “ფეისბუქზე” ხშირად აქვეყნებს საკუთარი ნახატის ფოტოებს.
შვილის სკანდალი:
2017 წელს ირაკლი სესიაშვილს შვილთან დაკავშირებით განმარტებების გაკეთება მოუწია. საქმე იმაშია, რომ მაშინ “ნაციონალურმა მოძრაობამ” გაავრცელა ინფორმაცია, რომ დავით სესიაშვილი ქურდობის საქმეში მონაწილეობდა და პროკურატურამ, ირაკლი შოთაძის უშუალო ჩარევის შედეგად, ეს საქმე საერთოდ მიჩქმალა. საქმე ეხებოდა 2015 წლის 5 მარტს, ავტომანქანიდან ხელჩანთის ქურდობის ფაქტს. ენმ-ს მიერ ინფორმაციის გავრცელებიდან მალევე პროკურატურამ საქმის დეტალები გაასაჯაროვა. უწყებამ უარყო საქმესთან დავით სესიაშვილის კავშირი.
ქონებრივი დეკლარაცია:
ირაკლი სესიაშვილი თბილისში თოიძის ქუჩაზე ორ სახლს ფლობს. როგორც დეკლარაციაში აქვს მითითებული, აღნიშნულ ადგილზე თავდაპირველად შეიძინა 1637 კვ/მ მიწა, შემდეგ კი 2010 წელს ერთი სახლის მშენებლობა დაასრულა, რომელიც 55 ათასი ლარი დაჯდა, ხოლო 2016-20 წლებში აშენდა მეორე სახლი, რომელიც ოჯახს 200 000 ლარი დაუჯდა. (ცნობისთვის, სესიაშვილის სახლის თემას 2018 წელს აქტიურად განიხილავდა მედია).
ასევე პოლიტიკოსის სახელზეა 18 000 დოლარად შეძენილი მიწის ნაკვეთი საგურამოში. სესიაშვილმა მამისგან მიიღო მემკვიდრეობით მიწის ნაკვეთები ყვარელსა (7000 კვ.მ) და გრემში (1343). ასევე მამისგან მიიღო მემკვიდრეობით ბინა თელავში, რომელიც შემდეგ 55 000 დოლარად გაყიდა. დეკლარაციის თანახმად, მამისგან მემკვიდრეობით აქვს მიღებული 48 400 ლარიც.
რაც შეეხება სესიაშვილის ანაზღაურებას, როგორც ირკვევა, 2021 წლის იანვრიდან მაისამდე, პარლამენტის წევრობის დროს 18850 ლარი მიიღო, ხოლო მაისიდან 2021 წლის ბოლომდე, პრემიერის მრჩევლის პოზიციაზე ყოფნისას, 36 984 აუნაზღაურდა.
როგორც უკვე აღვნიშნეთ სამეწარმეო საქმიანობას ეწევა სესიაშვილის მეუღლე – თინათინ კიკილაშვილი სს “ბათუმისბულვარ საიდის” აქციონერია, ასევე არის შპს “ტერმინალ ლაბბერსა საქართველოს” 10%-იანი წილის მფლობელი.
წყარო: ambebi.ge