გადავდივართ ელექტრონულ საარჩევნო სისტემაზე, რომელიც ჯერ ევროკავშირის ყველა ქვეყანაშიც კი არ არის

გივი მიქანაძე – გადავდივართ ელექტრონულ საარჩევნო სისტემაზე, რომელიც ჯერ ევროკავშირის ყველა ქვეყანაშიც კი არ არის დანერგილი და რომელიც უმაღლეს სტანდარტად ითვლება.

ჩვენ გადავდივართ ელექტრონულ საარჩევნო სისტემაზე, რომელიც ჯერჯერობით, ევროკავშირის ყველა ქვეყანაშიც კი არ არის დანერგილი, – განაცხადა საპარლამენტო უმრავლესობის წევრმა, გივი მიქანაძემ საქართველოს პირველი არხის გადაცემაში „თავისუფალი ხედვა“.

„ცვლილებათა პაკეტი მხოლოდ ელექტრონული საარჩევნო სისტემის შემოღებას არ მოიცავს, ეს საკითხების საკმაოდ ფართო სპექტრია. თუმცა, რა თქმა უნდა, ამ ყველაფრის ძირითადი ქვაკუთხედი არის ელექტრონული სისტემა. ჩვენ გადავდივართ თვისობრივად ახალ საარჩევნო სისტემაზე. ეს არის საარჩევნო სისტემა, რომელიც ჯერჯერობით, ევროკავშირის ყველა ქვეყანაშიც კი არ არის დანერგილი და, რომელიც დღესდღეისობით, უმაღლეს სტანდარტად ითვლება“, – განაცხადა მიქანაძემ.

მისი თქმით, ეს არის ფურცლის მეშვეობით ხმის მიცემა, სადაც ხდება ამ ფურცლის ჩაშვება ელექტრონულ აპარატში და არა ყუთში.

„მხოლოდ ჩვენი ქვეყანა კი არა, მსოფლიოს ნებისმიერი ქვეყანა კიბერუსაფრთხოების კუთხით ძალიან ბევრი რისკების წინაშე დგას, რომ გარე ძალიდან არ მოხდეს ზემოქმედება და სწორედ ეს არის მთავარი მიზეზი, თუ რატომ არ ხდება დისტანციურად ხმის მიცემის შემოღება. ეს სისტემა არ არის ინტერნეტში ჩართული, ეს არის ლოკალური და ამიტომ, გარე მხრიდან შეღწევადობა გამორიცხულია. შესაბამისად, ამ სისტემის დანერგვით უსაფრთხოება დაცულია და შეცდომებისგან დაცული ვართ. ფაქტობრივად, ბათილი ბიულეტენები აღარ იქნება, საჭირო აღარ იქნება პარალელური დათვლის შედეგები, ეგზიტპოლები და ა.შ.“, – განაცხადა მიქანაძემ.

მისი თქმით, 2024 წელს აღნიშნული ფორმატით არჩევნების ჩატარება განხორციელდება სულ მცირე, 70% ამომრჩევლის მონაწილეობით და არა უბნების 70%-ში, როგორც ამის შესახებ რიგი მედიასაშუალებები საუბრობს.

„70% ამომრჩეველი ბევრად უფრო მეტია, ვიდრე 70% უბნები. იმიტომ, რომ ზოგიერთი უბანი 20-30-კაციანი გვაქვს. ამასთან, აქ საუბარია მინიმუმზე. ჩვენ გარანტირებულად ვამბობთ, რომ მინიმუმ, 70% ამომრჩეველი შეძლებს, ამ ფორმით მიიღოს მონაწილეობა. თუმცა, მიმდინარე ორი წლის განმავლობაში შევხედავთ, რა რესურსები და შესაძლებლობა იქნება, ტექნიკურად რამდენად შესაძლებელია ეს და შესაძლებელია, ეს პროცენტი 80-90%-ზეც კი ავიდეს“, – განაცხადა მიქანაძემ.

გადაცემის წამყვანის შეკითხვაზე, რატომ არ შეიძლება ელექტრონული სისტემების დანერგვა ასივე პროცენტში, რასაც ოპოზიცია ითხოვს, გივი მიქანაძემ განაცხადა, რომ ოპოზიცია ძალიან იაფფასიან სპეკულაციას მიმართავს.

„ოპოზიცია ვერ დაასახალებს ვერც ერთ ქვეყანას, სადაც უბნების 100-ვე პროცენტში არის ელექტრონული სისტემა. იმიტომ, რომ ეს არის საკმაოდ ძვირადღირებული ტექნოლოგია, რომელიც მცირე რაოდენობის უბნებში არ გამოიყენება, რადგან ძალიან ძვირდღირებულია და ამისგან თავს იკავებენ ყველაზე განვითარებული, ეკონომიკურად ძლიერი ქვეყნებიც კი. ამასთან, იმ უბნებში, სადაც ელექტრონული რეგისტრატორით და მთვლელი აპარატით ამომრჩეველს ვერ ექნება საშუალება, ხმა მისცეს, არჩევნები ჩატარდება ტრადიციული ფორმატით, მაგრამ არჩევნების დასრულებისთანავე ყუთიდან ამოღებული თითოეული ბიულეტენი დაექვემდებარება მაღალი სტანდარტით გაციფრულებას – სკანირება, ან ფოტოგრაფირება მაღალფიქსელიანი აპარატურით, რაც მყისიერად აიტვირთება ცესკო-ს ოფიციალურ ვებპორტალზე“, – განაცხადა მიქანაძემ.

მისივე თქმით, აქედან გამომდინარე შეიძლება, ითქვას, რომ 2024 წლიდან ფაქტობრივად, ქვეყნის ფარგლებში ჩატარებული ყველა არჩევნები ელექტრონული, დიგიტალური ფორმატით იქნება განხორციელებული.
ამასთან, გივი მიქანაძემ აღნიშნა, რომ რადიკალური ოპოზიცია, რომელსაც ხელჩასაჭიდი აღარაფერი დარჩა, 30%-ს არის ჩაჭიდებული, რაც საბოლოო ჯამში, შესაძლოა, იყოს 10-15%.

გიორგი გვიმრაძის შეკითხვაზე, რამდენად არის ხელისუფლება მზად, რომ ოპოზიციასთან განიხილოს პრობლემური საკითხები, გივი მიქანაძემ აღნიშნა, რომ ხელისუფლება მზადაა, ოპოზიციასთან ნებისმიერი საკითხი განიხილოს, თუმცა რადიკალურ ოპოზიციას ამის სურვილი არ აქვს.

შეკითხვაზე, იგეგმება თუ არა ცვლილებები იმ კუთხით, რომ საზღვარგარეთ მეტი უბნები გაიხსნას და ემიგრანტების რაც შეიძლება, დიდ რაოდენობას მიეცეს ხმის მიცემის საშუალება, მიქანაძემ განაცხადა, რომ ყველა ქალაქში უბნების გახსნა შეუძლებელია და უბნები იხსნება იქ, სადაც ამომრჩეველთა დიდი რაოდენობაა კონცენტრირებული, თუმცა გამოყოფილი ფინანსებიდან და მონაცემებიდან გამომდინარე ცესკო-ს შეუძლია, იმსჯელოს დამატებითი უბნების გახსნაზე, თუ სხვა ქალაქებშიც არის საქართველოს მოქალაქეების კონცენტრაცია.

„ჩვენი, როგორც პოლიტიკოსების და ამ შემთხვევაში პარლამენტის ფუნქციაა, კანონმდებლობა უზრუნველყოფდეს ასეთი უბნების გახსნას, მაგრამ ჩვენ კანონში ვერ გავწერთ, თუ რომელ ქალაქებში უნდა იყოს ეს გახსნილი. ეს ჩვენი საქმე არ არის“, – განაცხადა გივი მიქანაძემ.

წყარო: 1tv.ge