ზაზა შათირიშვილი – ამერიკელებმა და კეზერაშვილმა, ალტერნატივის სახით, გემის სკანდალი მოიგონეს, რომლის უკან კეზერაშვილის კვალი ამ შემთხვევაშიც იოლად გაიშიფრა.
ამერიკელები, კეზერაშვილი და რადიკალები ცდას არც მომავალში დააკლებენ, რათა ხელისუფლება და ქვეყანა რამენაირად დააზიანონ – ამის შესახებ ფილოსოფოსი ზაზა შათირიშვილი აცხადებს.
როგორც შათირიშვილი აღნიშნავს, გუშინ მედიაში გავრცელდა გერმანული ჟურნალისტური გამოძიების ფარგლებში მოპოვებული კიდევ ერთი ფოტო, სადაც დავით კეზერაშვილთან ერთად, მისი მეგობარი და ბიზნესპარტნიორი, ვანო ნაკაიძეა გამოსახული. ფოტო ზუსტად იმავე პერიოდშია გადაღებული, როდესაც დავით კეზერაშვილმა კურტ ვოლკერთან ერთად საქმიანად ივახშმა.
– “ვანო ნაკაიძე ის ბიზნესმენია, რომლის გემიც ივნისის ბოლოს ბათუმის პორტში შემოვიდა, რის შესახებაც ელენე ხოშტარიამ საგანგებო ბრიფინგი გამართა, საქართველოში გემით სანქცირებული რუსული ტვირთი შემოაქვთო.
ანუ იკვრება საინტერესო ჯაჭვი – ვოლკერი, კეზერაშვილი, ნაკაიძე, ხოშტარია: იმ პერიოდში, როდესაც კეზერაშვილთან შეხვედრებს მართავს მაღალჩინიანი ამერიკელი, კურტ ვოლკერი, კეზერაშვილის ბიზნესპარტნიორს საქართველოში შემოჰყავს გემი და ამ საბაბით, კეზერაშვილისვე დაფინანსებული ელენე ხოშტარია საქართველოს ხელისუფლებას სანქცირებული რუსული ტვირთის ტრანზიტში ადანაშაულებს. როგორც იტყვიან, საქმე თეთრი ძაფით არის ნაკერი.
საზოგადოებას ახსოვს, რომ სანქციების გვერდის ავლაში რუსების დახმარებაში რადიკალური ოპოზიცია ხელისუფლებას მანამდე ვლადიმირ ევტუშენკოვის გაუგებარ ზარზე მითითებით ადანაშაულებდა. თუმცა, ჰოი, საოცრებავ და მალევე აქაც ამერიკული კვალი გამოაშკარავდა. გაირკვა, რომ ევტუშენკოვი ბაიდენის ოჯახთან დაკავშირებული ბიზნესმენია და ამის გამო, ის ამერიკულ სანქციებსაც მარტივად გადაურჩა. სანქციებს გადარჩენილი რუსი მილიარდერი ნებისმიერი ამერიკული დავალების შესრულებაზე რომ იქნებოდა წამსვლელი, ამაში ეჭვი, ალბათ, არავის ეპარება. მახვილ თვალს არც ის გამოეპარებოდა, რომ უნიჭოდ დადგმული სკანდალის აგორებისთანავე, ევტუშენკოვმა პირველი ინტერვიუ არა რადიკალური ოპოზიციის რომელიმე მეტნაკლებად რეიტინგულ ტელევიზიას, არამედ კეზერაშვილის სრულიად ურეიტინგო „ფორმულას“ მისცა. საბოლოოდ, სკანდალის უნიჭოდ შედგენილი გეგმა ჩავარდა და როგორც ჩანს, ამერიკელებმა და კეზერაშვილმა, ალტერნატივის სახით, გემის სკანდალი მოიგონეს. თუმცა, „არა არს დაფარული, რომ არ გაცხადდეს“ და მოგონილი სკანდალის უკან კეზერაშვილის კვალი ამ შემთხვევაშიც იოლად გაიშიფრა” – აცხადებს შათირიშვილი.
მისივე თქმით, საბოლოოდ, ამერიკელებისა და კეზერაშვილის მიერ სკანდალის აგორების ორივე მცდელობა მარცხით დასრულდა.
– “კეზერაშვილმა რუსული რუბლების სკანდალში გახვეული ხოშტარია კომიკური ხაბეიშვილით ჩაანაცვლა და მისი აქტიურობით სცადა თემის აწევა, მაგრამ ესეც ამაოდ. ამის მთავარი მიზეზი კი, გეგმის ავტორების უნიჭობაზე მეტად, საქართველოს ხელისუფლების მხარეს არსებული სიმართლეა. ხელისუფლება მკაცრად იცავს გაცემულ პირობას და სანქციების გვერდის ავლის პრეცედენტს არ უშვებს. ასეთ დროს კი, ამბის ხელოვნურად მოგონება სერიოზულ სირთულეებთან არის დაკავშირებული.
ამერიკელები, კეზერაშვილი და რადიკალები ცდას არც მომავალში დააკლებენ, რათა ხელისუფლება და ქვეყანა რამენაირად დააზიანონ. პოლიტიკურად გაკოტრებული და ოლიგარქობაში მხილებული კეზერაშვილი კი, ამჯერად ვანო მერაბიშვილის ხელით „ნაცმოძრაობის“ პარტიის ექსპროპრიაციითაა დაკავებული. პარალელურად ის, ვანო ნაკაიძის ხელით, გაკოტრებული ხოშტარიას, ჯაფარიძისა და ვაშაძის ერთკაციანი პარტიებისგან ერთი „მძლავრი“ ამრევი პარტიის შექმნას ცდილობს.
მართალია, ჯუფდებადობის კანონით, მამრავლების გადანაცვლებით ჯამი არ იცვლება და ნული ვაშაძის ნული ჯაფარიძისა და ნული ხოშტარიას ნამრავლი ისევ ნულს გვაძლევს, ასევე არც „ნაციონალების“ აღორძინება ჩანს რეალური, მაგრამ ხელისუფლებამ მაქსიმალური სიფრთხილე უნდა გამოიჩინოს და ქვეყნის ინტერესების დაზიანების შესაძლებლობა არავის უნდა მისცეს” – აცხადებს შათირიშვილი.
წყარო: 1tv.ge