“რაც შეეხება გუშინდელ დებატებს, მგონი, ყველას მოგვხვდა თვალში, რომ მთელი დებატების განმავლობაში, არავინ, კითხვის ნიშნის ქვეშ არ დააყენა, რომ მიხეილ სააკაშვილის მიმართ გამოტანილი განაჩენი კანონიერია, საერთოდ არავინ. ვფიქრობ, ეს არის მთავარი მიღწევა იმ დისკუსიისა, რომელიც მიმდინარეობს ამ საკითხთან დაკავშირებით.” – ამის შესახებ პარლამენტის თავმჯდომარე შალვა პაპუაშვილმა განაცხადა.
ჩვენ ვნახეთ შედეგი – გუშინ საერთოდ არავის უხსენებია სიტყვა „პოლიტპატიმარი“, „უკანონო განაჩენი“, გათავისუფლება იმის გამო, რომ არის უკანონოდ დაჭერილი. ამით წერტილი დაესვა, მათ შორის, ევროპულ პარლამენტში საკითხს, მიხეილ სააკაშვილი სასჯელს კანონიერად იხდის თუ არა. წერტილი – ეს არის კანონიერი განაჩენი, მიხეილ სააკაშვილმა ჩაიდინა დანაშაული, ეს აღიარებულია, გუშინ არავის დაუყენებია კითხვის ნიშნის ქვეშ. ყველა ვთანხმდებით და ჩვენი თვალით ვნახეთ, ჩვენი ყურით მოვისმინეთ, აღარავინ ახსენებს, თითქოს მიხეილ სააკაშვილი არის უკანონოდ დაკავებული, პოლიტპატიმარი და ა.შ. ეს თემა დახურულია, მიხეილ სააკაშვილი იხდის კანონიერ სასჯელს.
რაც შეეხება მიხეილ სააკაშვილის ჯანმრთელობის მდგომარეობას, კიდევ ერთხელ ვამბობ – ჩვენ ვართ სამართლებრივი სახელმწიფო, მათ შორის ჰუმანური სახელმწიფო, რომელიც განსაკუთრებით ზრუნავს პატიმრებზე, ვინაიდან სახელმწიფოს დაცვის ქვეშ იმყოფებიან, ვინაიდან არიან პენიტენციურ სისტემაში და შეზღუდული აქვთ თავისუფლება. სახელმწიფო ზრუნავს, მათ შორის, მიხეილ სააკაშვილზე და ყველაფერს აკეთებს ამისთვის. აქაც არავის, არსად, არასდროს, მათ შორის, ამ დასკვნებში არ დაუსახელებია სერვისი, რომელიც მას არ მიეწოდება, რაიმე ანალიზი, რომელიც მას არ ჩაუტარდა, რაიმე სხვა საკითხი, რომელიც მას სჭირდებოდა და არ მიეცა. ვნახეთ პირიქით, რომ, ერთი მხრივ, ის სარგებლობს ისეთი საკითხებით, რომლებიც, როგორც წესი, პაციენტს არ უნდა ჰქონდეს. რაც შეეხება იმას, რამდენი გამომსვლელი იყო და ა.შ. სიმართლე რაოდენობით არ ითვლება, სიმართლე ითვლება შინაარსით. როგორც გუშინ ყველას მოუწია აღიარება, რომ სააკაშვილის სასჯელი არის კანონიერი და ვეღარავინ ახსენა სიტყვა „პოლიტპატიმარი“, სიტყვა „უკანონო განაჩენი“, როგორც გუშინ ეს სიმართლე დამტკიცდა, ასე დამტკიცდება ყველაფერი“, – განაცხადა შალვა პაპუაშვილმა.