უყრაინის პრეზიდენტის ვლადიმერ ზელენსკის განცხადებით, მნიშვნელოვანია, რომ უყრაინას მისმა პარტნიორებმა ტანკები მიაწოდონ.
ამის შესახებ მან ევროპული საბჭოს პრეზიდენტთან შარლ მიშელთან ერთად გამართულ პრესკონფერენციაზე განაცხადა.
უყრაინის პირველმა პირმა ის ქვეყნებიც დაასახელა, რომლებიც მზად არიან უყრაინას ტანკები მიწოდონ მწარმოებლის თანხმობის შემთხვევაში.
„ტანკების საკითხი აქტუალური და ძალიან მგრძნობიარე რჩება. ის დამოკიდებულია ბევრ მიზეზზე და სამწუხაროდ, დამოკიდებული არ არის უკრაინის სურვილზე. რუსეთის ფედერაციის ათასობით ტანკის წინააღმდეგ ჩვენი სამხედროების სიმამაცე და უკრაინელი ხალხის მოტივაცია საკმარისი არ არის“, – განაცხადა ზელენსკიმ.
როგორც მან პრესკონფერენციაზე აღნიშნა, უყრაინას სჭირდება შესაბამისი იარაღი – პრეზიდენტის თქმით, მას უნდა ჰქონდეს ან დიდი რაოდენობით საარტილერიო სისტემა ან ადეკვატური რაოდენობის ტანკები.
„პოლონეთი მზად არის, ასევე ფინეთი, პორტუგალია, ესპანეთი და კიდევ საკმარისი რაოდენობა ქვეყნებისა, რომ უკრაინა ტანკებით უზრუნველყონ. ისინი მზად იყვნენ ეს აქამდეც გაეკეთებინათ. ჩვენ ყველა ველით იმ ქვეყნის ნებართვას, რომელსაც აქვს ამა თუ იმ შესაბამის ლიცენზიებზე უფლება“,- განაცხადა ზელენსკიმ.
ამასთან, ქვეყნის პირველმა პირმა აღნიშნა, რომ უყრაინას არა მხოლოდ პარტნიორების დახმარების იმედი აქვს, არამედ მუშაობს საკუთარი იარაღის წარმოებაზე.
მისივე თქმით, უყრაინისთვის საკმარისი არ არის ის იარაღი, რომლებსაც მას პარტნიორები აწვდიან, რადგან ზელენსკის თქმით, იარაღის მიწოდების სიჩქარეზე დამოკიდებულია ადამიანთა სიცოცხლე.
„საკმარისია თუ არა ის რასაც გვაძლევენ ? არა, არ არის საკმარისი. არ არის საკმარისი იმისთვის, რომ უფრო სწრაფად ვიმოქმედოთ. სისწრაფე და დრო მნიშვნელოვანია. ყოველი წუთი – ადამიანია. რაც უფრო სწრაფად შევძლებთ ჩვენი ტერიტორიების დეოკუპაციას, მით რაც უფრო სწრაფად შევძლებთ, ვიყოთ უფრო ძლიერები, მით მეტ მოქალაქეს შევინარჩუნებთ“,- განაცხადა პრეზიდენტმა ზელენსკიმ.