ვიღაცები ცდილობენ ხოლმე, უცხოელებმა რაღაცა გვითხრან და მათ ჭკუაზე ვიცხოვროთ, ერთი რამე უნდა ვიცოდეთ, ნებისმიერ ქვეყანაში გატარებული უნდა იყოს იმ ხალხის ინტერესი, ვინ იქ ცხოვრობს. სხვისი დღის წესრიგით ვერ ვიცხოვრებთ, იმის იმედი ნუ ექნებათ, რომ ვიღაც რაღაც სიას შეადგენს, – ამის შესახებ ბოდბელმა ეპისკოპოსმა, მეუფე იაკობმა ნინოობის სადღესასწაულო წირვის დასრულების შემდეგ, ქადაგებისას განაცხადა.
„ერთი რამ ვიცოდეთ, ნებისმიერ ქვეყანაში იმ ერის, ხალხის ინტერესი უნდა იყოს გატარებული, ვინც იქ ცხოვრობს. ჩვენ სხვისი დღის წესრიგით ვერ ვიცხოვრებთ. ისევე როგორც სხვა ქვეყნებს აქვთ თავიანთი დღის წესრიგი, ჩვენ არ შეიძლება, ვინმეს დავაწესებინოთ. მით უმეტეს, ქრისტეს ერი ვართ, ღვთისმშობლის ერი ვართ, წმინდა ნინო არის ჩვენი დედა. ვინ უნდა გვასწავლოს, ჩვენ რა გავაკეთოთ?! მთავარია, ერთმანეთი გვიყვარდეს და ერთმანეთი არ დავჭამოთ. იმის იმედი ნუ ექნებათ, რომ ვიღაც რაღაც სიას შეადგენს. საქართველოსთან ურთიერთობა თუ უნდათ, ჩვენც გვინდა მსოფლიოსთან ურთიერთობა.
ლაპარაკი ყველამ უნდა ვისწავლოთ. შეცდომები თუ გვაქვს, დავსხდეთ და წყნარად ვილაპარაკოთ. ჩვენ ვართ დამოუკიდებელი, თავისუფალი ქვეყანა და გვჭირდება თავდაცვის საშუალებებიც. ჩვენ თავს არასდროს არავის ვესხმით. ჩვენ უნდა ვიზრუნოთ იმისთვის, რომ გავაძლიეროთ ჩვენი ქვეყანა“, – განაცხადა მეუფე იაკობმა.