საქართველო აუცილებლად გახდება ევროკავშირის წევრი, მთელი საქართველოს მოსახლეობა იხილავს, რომ მათ შორის ევროპარლამენტში არის ძალიან განსხვავებული აზრი, სწორედ ეს არის დემოკრატია. ეს არის ერთ-ერთი დეპუტატის მოსაზრება, შეიძლება სხვა დეპუტატსაც ჰქონდეს განსხვავებული მოსაზრება და ა.შ, – ამის შესახებ იუსტიციის მინისტრმა, რატი ბრეგაძემ ევროპარლამენტარ, მარინა კალიურანდის განცხადების კომენტირებისას აღნიშნა.
მინისტრის თქმით, „საბოლოო ჯამში, ევროკავშირი მიიღებს იმ გადაწყვეტილებას, რომელიც ყველას მოეწონება.
„ვინმე თუ გვაკრიტიკებს, მან შესაბამისი არგუმენტები უნდა მოიყვანოს. რაც შეეხება სასამართლო სისტემას. საქართველოში დღეს არის სასამართლო სისტემა ყველაზე დამოუკიდებელი მისი არსებობის ისტორიაში. იუსტიციის და საგარეო სამინისტროების თანამშრომლები დადიან ევროპულ დედაქალაქებში და გადიან კოლეგებთან ყველა იმ საკითხს, რომელიც 12 პუნქტის შესრულებას უკავშირდება. კარგის მეტი არაფერი გაგვიგია ჩვენი ევროპელი კოლეგებისგან 12 პუნქტის შესრულებასთან დაკავშირებით. შეგვიძლია, გაჩვენოთ, რამდენად დიდი პროგრესი აქვს მიღწეული საქართველოს, მათ შორის სხვა ქვეყნებთან მიმართებაში. დარწმუნებული ვარ, რომ კანდიდატის სტატუსი აუცილებლად გვექნება“, – განაცხადა ბრეგაძემ.
ევროპარლამენტარმა, მარინა კალიურანდმა დღეს განაცხადა, რომ „საქართველო ჩამორჩება უკრაინას და მოლდოვას რამდენიმე ძირითად სფეროში“.