არ ღირდა მიხეილ სააკაშვილის გამო ურაინის ხელისუფლებასთან საქმის გაფუჭება, ისევე, როგორც ახლა ზელენსკის მხრიდან არ ღირდა სააკაშვილის გამო საქართველოსთან საქმის გაფუჭება, – ამის შესახებ „გირჩის“ ერთ-ერთმა ლიდერმა, იაგო ხვიჩიამ განაცხადა.
მისი თქმით, „გირჩი“ იყო ერთ-ერთი პირველი, ვინც აცხადებდა, რომ მიხეილ სააკაშვილი უნდა გადაეყვანათ საზღვარგარეთ სამკურნალოდ.
„პირველი პარტია ვიყავით, „ნაცმოძრაობაზე“ წინაც ვამბობდით, რომ მიხეილ სააკაშვილი უნდა გადაეყვანათ საზღვარგარეთ სამკურნალოდ. როდესაც ამას ვამბობდით, ვიცოდით, რომ მიხეილ სააკაშვილის ფაქტორი პრობლემას შექმნიდა როგორც ქვეყნის შიგნით, ისე, განსაკუთრებით, ქვეყნის გარეთ, ჩვენს პარტნიორებთან. არ ღირდა მიხეილ სააკაშვილის გამო უკრაინის ხელისუფლებასთან საქმის გაფუჭება. ისევე, როგორც ახლა ზელენსკის მხრიდან არ ღირდა სააკაშვილის გამო საქართველოსთან საქმის გაფუჭება. ზოგადად, ეს არის ასეთი ფაქტორი და ჩვენ თავიდანვე ვაფრთხილებდით ამის შესახებ „ქოცებს“, რომ მიხეილ სააკაშვილი საჩუქრად გაეგზავნათ სადმე და ამისთვის დაერქვათ მისი სამკურნალოდ გადაყვანა – ეს იქნებოდა ყველაზე სწორი გადაწყვეტილება და არ მივიდოდით აქამდე. ახლა საქმე გაფუჭებულია. ამ გაფუჭებული საქმის ფარგლებში ტყუილ-მართლის გარჩევა, უბრალოდ, ჭირს“, – განაცხადა ხვიჩიამ.
უყრაინის პრეზიდენტმა, ვლადიმერ ზელენსკიმ გუშინ განაცხადა, რომ სთხოვს საქართველოს ელჩს, 48 საათის განმავლობაში დატოვოს უკრაინა, რათა კონსულტაციები გამართოს თბილისში მიხეილ სააკაშვილის უყრაინაში დაბრუნებაზე. ზელენსკის თქმით, რუსეთი საქართველოს ხელისუფლების ხელით კლავს უყრაინის მოქალაქე მიხეილ სააკაშვილს.