ნატო-ს ვილნიუსის სამიტზე ვნახეთ, როგორი ძლიერი მხარდაჭერა გამოიხატა უკრაინის მიმართ, რაც ბუნებრივია, მაგრამ ცუდია ის, რომ საქართველოს ამ პროცესისგან ფაქტობრივად ვერაფერი მიიღო, რაც არა დასავლელი პარტნიორების, არამედ „ქართული ოცნების“ ბრალია, – ამის შესახებ ოპოზიციონერმა დეპუტატმა, პაატა მანჯგალაძემ განაცხადა.
როგორც პაატა მანჯგალაძემ აღნიშნა, გერმანული გამოცემა პირდაპირ საუბრობდა იმის შესახებ, რომ ირაკლი ღარიბაშვილი სასურველ სტუმრად არ იქნა მიჩნეული.
„ეს იმიტომ, რადგან ბოლო დროის ყველა მაღალი რანგის სამიტზე ღარიბაშვილი საუბრობდა, როგორც რუსი ტროლ-ბოტი. მან თქვა, თურმე რუსეთი უკრაინას ნატო-ს გამო დაესხა თავს, რაც ხალხმა იმგვარად უნდა გაიგოს, რომ თუ ნატო-სკენ არ წავალთ, მშვიდობა იქნება. მოქალაქეებს სიმართლე უნდა ვუთხრათ: 2008 წელს რუსეთის თავს იმიტომ დაგვესხა, რომ ნატო-ს წევრები არ ვიყავით. უკრაინასაც თავს იმიტომ დაესხა, რომ ნატო-ში არ იყო. უფრო აღიზიანებს 1.5-მილიონიანი ესტონეთი, რომელიც რუსი ეროვნების მოსახლეობის 25%-ს მოქალაქეობას არ აძლევს, მაგრამ საზღვარზე ჩიტსაც ვერ აუფრენს, რატომ? იმიტომ, რომ ესტონეთი არის ნატო-ს წევრი. 1.5-მილიონიანი ესტონეთი უფრო დაცულია, ვიდრე 40-მილიონიანი უკრაინა. ეს მაგალითია იმის, რომ საქართველოს მომავალი არის ნატო-სა და ევროპაში, მაგრამ სამწუხაროა, რომ ამ ისტორიული შესაძლებლობების დროს ჩვენ გყავს ხელისუფლება, ვისაც ეს არ აინტერესებს.
დამაფიქრებელია, რომ ამ ისტორიულ გზაგასაყარზე და ამ ისტორიული შანსის პირობებში ჩვენი სტრატეგიული პარტნიორის, აშშ-ს პრეზიდენტი საქართველოს მოიხსენიებს ბელორუსთან ერთად, სადაც დემოკრატიისა და ადამიანის უფლებების დაცვის პრობლემებია. ეს სამწუხაროა, მაგრამ ჩვენს გასაკეთებელს ბაიდენი არ გააკეთებს“, – განაცხადა პაატა მანჯგალაძემ.