ოპოზიციონერი დეპუტატები რომან გოცირიძე და ხატია დეკანოიძე აცხადებენ, რომ საქართველო დემოგრაფიული კატასტროფის ზღვარზეა. „ევროოპტიმისტებმა“ მიგრაციასთან დაკავშირებით დღეს პრეზენტაცია გამართეს.
რომან გოცირიძემ აღნიშნა, რომ საქართველოში დემოგრაფიული კრიზისი გამოიხატება ქვეყნის მოსახლეობის შემცირებით, რაც გამოწვეულია მასშტაბური მიგრაციით და შობადობის კლებით.
მისი თქმით, მიგრაცია ქვეყნის ერთ-ერთი უდიდესი პრობლემაა, რადგან ყოველწლიურად უფრო მეტი ადამიანი გადის ქვეყნიდან, ვიდრე შემოდის.
„ამ პრობლემის გადაჭრის მთავარი გზა ისეთი სოციალურ-ეკონომიკური პოლიტიკის გატარებაა, რომელიც უზრუნველყოფს ცხოვრების დონის ამაღლებას და შედეგად – მოსახლეობის რიცხოვნების სტაბილიზაციას. 2013-2022 წლებში საქართველოს ეკონომიკა საშუალოდ 4.2%-ით იზრდებოდა. მიგრაციის მთავარი მიზეზია დაბალი ეკონომიკური ზრდა, დაბალი ანაზღაურება, უმუშევრობა და უიმედობა. ყოველწლიურად საქართველოს უფრო მეტი მოქალაქე ტოვებს, ვიდრე ბრუნდება. ამ მხრივ გამონაკლისი იყო 2020 წელი, როდესაც დადებითი მიგრაციული სალდო (სხვაობა ემიგრანტებს და იმიგრანტებს შორის) დაფიქსირდა. პანდემიის გამო ქვეყნის საზღვრები ჩაიკეტა და ადამიანები ვერ მიდიოდნენ ემიგრაციაში. ამასთან, ამავე პერიოდში მოქალაქეების დიდი ნაწილი დროებით დაბრუნდა ემიგრაციიდან. 2021-2022 წლებში კი საქართველოს მოქალაქეების ემიგრაციის მაჩვენებელი მკვეთრად გაიზარდა.
2022 წელს ქვეყანა 46.4 ათასით მეტმა საქართველოს მოქალაქემ დატოვა, ვიდრე დაბრუნდა, რაც 2012-2022 წლებში დაფიქსირებული უარყოფითი მიგრაციული სალდოს ყველაზე მაღალი მაჩვენებელია. ანუ, მას შემდეგ, რაც მსგავსი სტატისტიკა იწარმოება. ეს მაჩვენებელი მაღალი იყო 2021 წელსაც – 40 825. 2012-2022 წლებში 244 966 საქართველოს მოქალაქე დარჩა უცხოეთში, რაც ბათუმისა და ზუგდიდის მოსახლეობას აღემატება.
2012-2022 წლებში უცხო ქვეყნის 225 865 მოქალაქე დამკვიდრდა საქართველოში. 2012-2022 წლებში რუსეთის 93 872 მოქალაქე დარჩა საქართველოში, მხოლოდ 2022 წელს კი – 56 369“, – განაცხადა გოცირიძემ.