სომალიში ისლამისტური დაჯგუფების წევრებმა გაეროს ვერტმფრენი ხელში ჩაიგდეს და მისი ეკიპაჟის ერთი წევრი მოკლეს. ტექნიკური პრობლემების გამო ვერტმფრენი იძულებული იყო სოფელში დაფრენილიყო, რომელსაც დაჯგუფება „აშ-შაბაბის“ წევრები აკონტროლებენ. ინფორმაციას Deutche Welle ავრცელებს.
ამ ინფორმაციის მიხედვით, ვერტმფრენში მყოფმა ორმა პირმა გაქცევა მოახერხა, ერთი კი გაქცევის მცდელობისას მოკლეს. კიდევ ექვსი ადამიანი „აშ-შაბაბმა“ მძევლად აიყვანა.
გაეროს ინფორმაციით, ვერტმფრენმა ქალაქ დუსამარებადან 70 კმ-ში ავარიული დაფრენა განახორციელა, რადგანაც მას ძრავის პრობლემა დაუფიქსირდა.
როგორც გაეროს პრესმდივანმა სტეფან დიუჟარიკმა ნიუ-იორკში განაცხადა, სიტუაციის დარეგულირებისთვის ყველა აუცილებელი ზომა იქნება მიღებული. ამჟამად გაეროს ყველა ფრენა ამ რეგიონში „მომდევნო შეტყობინებამდე“ შეჩერებულია.
ტერორისტული დაჯგუფება „აშ-შაბაბი“ სომალის მთავრობის წინააღმდეგ 2006 წლიდან იბრძვის. ის ისლამური ქვეყნის შექმნას გეგმავს. ამჟამად „აშ-შაბაბი“ სომალის ნაწილს აკონტროლებს. ამ ტერიტორიაზე შარიათის კანონები მოქმედებს – ადამიანებს სიკვდილით სჯიან, აჭრიან კიდურებს და ამათრახებენ.