სომხეთმა კოლექტიური უსაფრთხოების ხელშეკრულების ორგანიზაციაში (ОДКБ) წევრობა „გაყინა“. ამის შესახებ ქვეყნის პრემიერ-მინისტრმა ნიკოლ ფაშინიანმა ტელეკომპანია France 24-ს განუცხადა.
მისი თქმით, სომხეთმა ორგანიზაციაში თავისი წევრობა იმის გამო შეაჩერა, რომ კოლექტიური უსაფრთხოების შესახებ შეთანხმება მათთან მიმართებით არ სრულდებოდა, „განსაკუთრებით, 2021-2022 წლებში“.
„არ შეიძლება, ეს ჩვენი ყურადღების გარეშე დარჩეს. ამ შეთანხმებაში მონაწილეობა შევაჩერეთ. ვნახოთ, რა იქნება მომავალში“, – ამბობს ფაშინიანი.
შესაბამის კითხვაზე პასუხად ფაშინიანმა აღნიშნა, რომ ამ ეტაპზე, სომხეთში რუსული სამხედრო ბაზის შენარჩუნების საკითხი დღის წესრიგში არ დგას.
ფრანგულ ტელეარხთან ინტერვიუში ფაშინიანმა განაცხადა, რომ აზერბაიჯანი სომხეთის წინააღმდეგ ახალი ომისთვის ემზადება. მისი თქმით, ბაქო დღევანდელ სომხეთს „დასავლეთ აზერბაიჯანად“ განიხილავს.
„ილჰამ ალიევს არ სურს სამშვიდობო ხელშეკრულება, რომელიც დაფუძნებული იქნება ტერიტორიული მთლიანობის ორმხრივ აღიარებაზე და სომხეთისთვის ახალი ტერიტორიების წართმევას გეგმავს“.
შეგახსენებთ, ორგანიზაციაში 1994 წლიდან ერთიანდებიან რუსეთი, ბელარუსი, ტაჯიკეთი, ყაზახეთი, ყირგიზეთი და სომხეთი.