ბენდელას“ სტადიონზე „საბურთალოს“ პრეზიდენტმა, ტარიელ ხეჩიკაშვილმა ეროვნული ლიგის ახალი სეზონის დაწყებამდე პრესკონფერენცია გამართა. მისი თქმით, ახალი სეზონიდან „საბურთალო“ „იბერია 1999“-ის სახელით იასპარეზებს. ხეჩიკაშვილმა გუნდის ახალწვეულებიც წარადგინა. ახალი სეზონიდან თბილისურ კლუბში სამი არგენტინელი და ერთი ნიდერლანდელი ფეხბურთელი ითამაშებს.
რომან გამარა, კრისტიან ლუდუენა და ლუსიანო ვიანო არგენტინის ვიცე-ჩემპიონიდან, „ტალიერესიდან“ მიიწვიეს, ხოლო დერეკ აგიაკვა ნიდერლანდური „ტვენტეს“ აკადემიის აღზრდილია. თამაშობდა „უოტფორდის“ 23-წლამდელთა გუნდში, იტალიურ „კომოსა“ და ინგლისურ „პორტვეილში“.
ტარიელ ხეჩიკაშვილი, „საბურთალოს“ პრეზიდენტი: „სახელის გადარქმევას თავისი მიზეზები გააჩნია. ეს ჩემთვისაც რთული გადაწყვეტილება იყო, მაგრამ მიმაჩნია, რომ კლუბის განვითარებისთვის აჯობებს, უბნის გუნდის პროექტი ეროვნული მიმართულებით განვითარდეს. ეს მარკეტინგულადაც სწორი ნაბიჯია და უცხოელ პერტნიორებთან ურთიერთობაშიც დაგვეხმარება.
რაც შეეხება ჩვენს ახალწვეულებს – საქართველოში უცხოეთიდან ძირითადად მოდიან ისეთი ფეხბურთელები, რომლებსაც სტიმული არ გააჩნიათ. ასეთების ჩამოყვანა მიუღებელია. ჩვენ გვსურს, რომ მოტივირებული მოთამაშეები ჩამოვიყვანოთ, რომლებსაც პარტნიორი კლუბები გვირჩევენ. მათთვის „იბერია 1999“ კარიერული ტრამპლინი უნდა გახდეს“.