ხანდაზმული შვეიცარიელი ქალების ჯგუფმა ადამიანის უფლებათა ევროპულ სასამართლოში კლიმატის საქმეზე პირველი გამარჯვება მოიპოვა.
სასამართლომ დაადგინა, რომ კლიმატის ცვლილება არღვევს პირადი და ოჯახური ცხოვრების პატივისცემის უფლებას.
ძირითადად 70 წელს გადაცილებული ქალები ამტკიცებდნენ, რომ თავიანთი ასაკისა და სქესის გამო განსაკუთრებით დაუცველები არიან კლიმატის ცვლილებასთან დაკავშირებული სიცხის ზემოქმედების მიმართ.
ადამიანის უფლებათა ევროპულმა სასამართლომ თქვა, რომ შვეიცარიის მცდელობები სათბური გაზების ემისიის შემცირების მიზნების მისაღწევად არაადეკვატური იყო. ეს პირველი შემთხვევაა, როდესაც სასამართლომ გადაწყვეტილება მიიღო გლობალური დათბობის შესახებ. გადაწყვეტილება სავალდებულოა და შეიძლება გავლენა იქონიოს კანონზე ევროპის 46 ქვეყანაში, მათ შორის, დიდ ბრიტანეთში.
სასამართლომ დაადგინა, რომ შვეიცარიამ „ვერ შეასრულა კლიმატის ცვლილების შესახებ კონვენციით გათვალისწინებული მოვალეობები“. ასევე დაადგინა, რომ „არსებობდა კრიტიკული ხარვეზები“ შვეიცარიის პოლიტიკაში კლიმატის ცვლილების წინააღმდეგ საბრძოლველად, მათ შორის სათბური გაზების შემცირების რაოდენობრივად ვერგანსაზღვრა. ეს არის აირები, რომლებიც ათბობენ დედამიწის ატმოსფეროს, როდესაც მოსახლეობა წვავს წიაღისეულ საწვავს, როგორებიცაა ნავთობი, ქვანახშირი და გაზი.
შვეიცარიელი ქალების ჯგუფი, სახელწოდებით KlimaSeniorinnen ან „უფროსი ქალები კლიმატის დაცვისთვის“, ამტკიცებდნენ, რომ მათ არ შეუძლიათ სახლების დატოვება და აქვთ ჯანმრთელობის პრობლემები შვეიცარიაში სიცხის დროს. სასამართლომ არ დააკმაყოფილა ექვსი პორტუგალიელი ახალგაზრდისა და საფრანგეთის ერთ-ერთი ქალაქის ყოფილი მერის მიერ წარდგენილი კიდევ ორი საქმე. ორივე ამტკიცებდა, რომ ევროპულმა მთავრობებმა ვერ მოახერხეს კლიმატის ცვლილების საკმარისად სწრაფად დაძლევა, რაც არღვევდა მათ უფლებებს. ათეულობით ქვეყნის მთავრობებმა ხელი მოაწერეს სათბურის გაზების ემისიების მკვეთრად შემცირებას, მაგრამ მეცნიერები და აქტივისტები აცხადებენ, რომ პროგრესი ძალიან ნელია და მსოფლიო არ არის გზაზე, რათა მიაღწიოს გადამწყვეტ მიზანს, შეზღუდოს გლობალური ტემპერატურის მატება 1.5 გრადუსამდე.