ვაშინგტონში რუსეთის ელჩი ანატოლი ანტონოვი ამერიკის შეერთებული შტატების მხრიდან რუსეთისთვის დაწესებულ სანქციების ახალ ტალღას გამოეხმაურა.
„აშშ-ის ადმინისტრაციამ „მიულოცა“ რუს ხალხს სანქციების მორიგი პაკეტის გამოცხადება. რუსეთის ფედერაცია ამერიკის შეერთებულ შტატებს გადამწყვეტ და ადეკვატურ პასუხს გასცემს“, – აცხადებს რუსი დიპლომატი.
შეგახსენებთ, ამერიკის შეერთებულმა შტატებმა სანქციები დაუწესა 90-ზე მეტ უცხოურ ფიზიკურ პირს და კომპანიას, რომლებიც რუსეთს ეხმარებიან, ძირითადად ჩინეთიდან და თურქეთიდან.
აშშ-ის სახაზინო დეპარტამენტის ცნობით, სანქცია შეეხო 90-ზე მეტ ფიზიკურ და იურიდიულ პირს – რუსეთიდან, ბელორუსიიდან, ბრიტანეთის ვირჯინიის კუნძულებიდან, ბულგარეთიდან, ყაზახეთიდან, ყირგიზეთიდან, ჩინეთიდან, არაბთა გაერთიანებული საამიროებიდან, სამხრეთ აფრიკიდან, სერბეთიდან და თურქეთიდან.
ცალკე, აშშ-ის ხაზინა აღწერს სანქციების აცილების ორ ქსელს, რომლებიც მდებარეობს ჩინეთსა და თურქეთში.