მინდა მადლობა გადავუხადო ჩინეთის ხელისუფლებას, რომელმაც საქართველოს მიმართ განსაკუთრებული მხარდაჭერა გამოხატა. ეს არის შედეგი, რომლისთვისაც „ქართული ოცნების“ გუნდი და პირადად მე წლების მანძილზე ვქმნიდით საფუძველს, – ამის შესახებ პარტია „ქართული ოცნების“ თავმჯდომარემ, ბიძინა ივანიშვილმა განაცხადა.
როგორც მან აღნიშნა, ჩინეთისა და საქართველოს თანამშრომლობის გაღრმავება არ არის ამერიკასა და ევროკავშირთან თანამშრომლობის ალტერნატივა, პირიქით, ეს შემავსებელი ფაქტორია მომდევნო წლებში საერთო თანამშრომლობის გაღრმავებისათვის.
ივანიშვილის თქმით, ის დარწმუნებულია, რომ საქართველოს ხელისუფლების ამ ძალისხმევას უკვე მომავალ წელს, დასავლეთიც დააფასებს.
„ხაზგასმით მინდა აღვნიშნო, რომ ჩინეთთან ჩვენი თანამშრომლობის გაღრმავება არ არის ალტერნატივა ამერიკის შეერთებულ შტატებთან და ევროკავშირთან თანამშრომლობისთვის. პირიქით, ეს არის შემავსებელი ფაქტორი იმ საერთო თანამშრომლობისთვის, რომელიც მომდევნო წლების განმავლობაში უნდა გაღრმავდეს. იმისათვის, რომ საქართველომ განავითაროს საკუთარი დამაკავშირებელი სავაჭრო-ეკონომიკური ფუნქცია, აუცილებელია თანამშრომლობა სავაჭრო-ეკონომიკური ურთიერთობების ორივე მხარესთან – დასავლეთთან და აღმოსავლეთთან. დარწმუნებული ვარ, უკვე მომავალ წელს, საქართველოს ხელისუფლების ამ ძალისხმევას დასავლეთშიც დააფასებენ. დარწმუნებული ვარ, ყველა გაიაზრებს იმასაც, რომ საქართველოში მშვიდობის შენარჩუნებით ჩვენ, ქართულ საქმესთან ერთად, მათი საქმეც გავაკეთეთ.“ – განაცხადა ბიძინა ივანაშვილმა.
ივანაშვილის “დიპლომატიური” ენა, მისი ფსიქოლოგიიდან და “მოღვაწეობის” პრაქტიკიდან გამომდინარე, ჩვენი აზრით, ასე ითარგმნება:
“ცოტაც მაცალეთ, მალე დაინახავთ, რომ რუსეთს ‘გადავაგდებ’, მე ისევ დასავლეთის საქმეს ვაკეთებ, ჩინეთთან ვაჭრობა თვითონ დასავლეთს სჭირდება. ახლა ოღონდ არჩევნები მომაგებინეთ და მერე ისევ თქვენი ვარ!”