ირანის ვიცე-პრეზიდენტმა, მუჰამედ ჯავად ზარიფმა თანამდებობა დატოვა.
მან პრეზიდენტ მასუდ პეზეშკიანის კაბინეტი თანამდებობაზე დანიშვნიდან 11 დღეში დატოვა.
„მე არ ვარ კმაყოფილი ჩემი საქმიანობით და ვნანობ, რომ მოლოდინები ვერ გავამართლე“, – დაწერა ზარიფმა სოციალურ ქსელ X-ზე.
ზარიფმა მიანიშნა, რომ მისი გადაწყვეტილების მიზეზი ირანის პრეზიდენტის ახალი კაბინეტისთვის მინისტრების შერჩევა გახდა. მისი თქმით, წარდგენილი 19 მინისტრიდან სულ მცირე 7 არ იყო მისი პირველი არჩევანი.
ცნობისთვის, მუჰამედ ჯავად ზარიფი ვიცე-პრეზიდენტის თანამდებობაზე მიმდინარე წლის 1-ელ აგვისტოს დაინიშნა. 2013-2021 წლებში იგი ირანის საგარეო საქმეთა მინისტრი იყო.
