უკრაინის საგარეო საქმეთა მინისტრის, დმიტრო კულებას განცხადებით, ქვეყანას რუსეთის სიღრმეში დასავლური იარაღის გამოყენებით ლეგიტიმურ სამიზნეებზე დარტყმების განხორციელებაზე ნებართვა სურს.
კულებამ ბრიუსელში, ევროკავშირის საგარეო საქმეთა მინისტრების არაფორმალური შეხვედრის წინ ჟურნალისტებს განუცხადა, რომ ის, პირველ რიგში, გულისხმობს აეროდრომებს, რომლებიც ბომბდამშენების გასაშვებად გამოიყენება.
„პირველ რიგში, ჩვენ ვსაუბრობთ სამხედრო აეროდრომებზე, საიდანაც მოქმედებენ რუსული ბომბდამშენები, სტრატეგიული და ტაქტიკური ავიაცია. თუ ჩვენ მოგვაწვდიან რაკეტების საკმარის რაოდენობას, თუ დარტყმის უფლებას მოგვცემენ, ჩვენ მნიშვნელოვნად შევამცირებთ რუსეთის შესაძლებლობებს ზიანი მიაყენოს ჩვენს კრიტიკულ ინფრასტრუქტურას და გავაუმჯობესებთ სიტუაციას ადგილზე ჩვენი ძალებისთვის“, – აღნიშნა კულებამ.
მისი თქმით, სრულმასშტაბიანი ომის დაწყების შემდეგ აშშ, დიდი ბრიტანეთი, ევროკავშირი და სხვა ქვეყნები კოალიციის სახით მოქმედებენ და ისეთ მნიშვნელოვან მოთამაშეს, როგორიც ევროკავშირია, ამ დისკუსიებში მნიშვნელოვანი ხმა აქვს.
„მოვუწოდებ ევროკავშირს, ითამაშოს როლი და მკაფიოდ დააფიქსიროს პოზიცია, რომ ეს არის ის, რაც უნდა გაკეთდეს ახლა – თუ ჩვენ გვსურს შევინარჩუნოთ ინიციატივა რუსეთის შესაძლებლობის ჩახშობით – გაანადგუროს უკრაინა და წინ წაიწიოს აღმოსავლეთში“, – აღნიშნა კულებამ.
