“მიეცით უფლება ქართველ ხალხს, რომ თავად გადაწყვიტოს საკუთარი მომავალი. არცერთი ქვეყანა არ უნდა ერეოდეს სხვა ქვეყანაში, არც შიგნით, არც გარეთ” – დანილო დელა ველე

ევროპარლამენტარმა დანილო დელა ველემ “იმედის კვირასთან” ინტერვიუში საქართველოს საპარლამენტო არჩევნებში გარე ჩარევის დაუშვებლობაზე ისაუბრა.

ევროპარლამენტარს მიაჩნია, რომ ქართველ ხალხს უნდა მიეცეს უფლება, თავად გადაწყვიტოს საკუთარი მომავალი.

“იმედის კვირამ” ევროპარლამენტარს გარე ჩარევის თავიდან არიდების მნიშვნელობის შესახებ დაუსვა კითხვა: „26 ოქტომბრის არჩევნების მოახლოებასთან ერთად , როგორ ფიქრობთ, არის თუ არა გადამწყვეტი მნიშვნელობის, რომ თავიდან ავირიდოთ ყველა ფორმის გარე ჩარევა, რომელმაც შესაძლოა ძირი გამოუთხაროს საქართველოს დემოკრატიულ პროცესებს? რა ზომები უნდა მიიღოს ევროკავშირმა იმისათვის რომ მხარი დაუჭიროს გამჭვირვალობის პროცესს ისე, რომ არ გამოიწვიოს უარყოფითი გავლენები, რაც საბოლოოდ რუსეთს მოუტანს სარგებელს?“

პასუხად ევროპარლამენტარმა განაცხადა:

“ვფიქრობ, ძალიან მარტივად – მიეცით უფლება ქართველ ხალხს რომ თავად გადაწყვიტონ საკუთარი მომავალი. არცერთი ქვეყანა არ უნდა ერეოდეს სხვა ქვეყანაში, არც შიგნით, არც გარეთ. არც რუსეთი, არც ევროკავშირი და არც ამერიკის შეერთებული შტატები არ უნდა ერეოდეს სხვა ქვეყნის არჩევნებში.“

ხოლო კითხვაზე, ხედავს თუ არა იგი რომელიმე ქვეყნის ან ორგანიზაციის მხრიდან ამჟამად გარე ჩარევის ნიშნებს, ევროპარლამენტარმა უპასუხა:

“საქართველო სენსიტიური სახელმწიფოა, სხვა ბევრი ქვეყნის მსგავსად. შესაძლოა იყოს გარკვეული მოძრაობები, რომელთაც ქვეყანაში დესტაბილიზაცია სურდეთ. იმედი მაქვს, რომ ასეთი რამე არ მოხდება“.