პოლონეთის საგარეო საქმეთა მინისტრმა რადოსლავ სიკორსკიმ განაცხადა, რომ მთავრობა აკვირდება სიტუაციას გერმანიის მიერ სასაზღვრო კონტროლის შემოღების შემდეგ.
სიკორსკიმ ხაზგასმით აღნიშნა, რომ გერმანიის საზღვრის კონტროლი ყველა მეზობელთან ძირს უთხრის შენგენის ზონის მნიშვნელობას.
„ჩვენ არ ვეთანხმებით ამ გადაწყვეტილებას. ჩვენ განვიხილავთ, როგორ ვუპასუხოთ. კონტროლის შემოღება შეცდომაა, რადგან არალეგალური მიგრანტების ნაკადის კონტროლის რეალური ადგილი, როგორც პოლონეთში, ისე გერმანიაში, შენგენის ზონის გარე საზღვარია“, – აღნიშნა პოლონეთის საგარეო საქმეთა მინისტრმა.
პოლონელი მინისტრის თქმით, „შენგენის ზონა არ არის მისი რომელიმე წევრის საკუთრება“.
„და მისი პოლიტიკის მართვის საკითხები, განსაკუთრებით მესამე ქვეყნებთან მიმართებაში, ერთობლივად უნდა გადაწყდეს და არა ცალმხრივად“, – დასძინა პოლონეთის საგარეო საქმეთა სამინისტროს ხელმძღვანელმა.
