ნატოს გენერალური მდივანი მარკ რუტე მიიჩნევს, რომ ალიანსის მოკავშირეებს არ უნდა ეშინოდეთ ბირთვული გაფრთხილების, რომელსაც კრემლის მეთაური ვლადიმირ პუტინი მიმართავს, რათა დასავლეთის მხრიდან უკრაინის სამხედრო დახმარება შეასუსტოს. ამის შესახებ მან Sky News-თან ისაუბრა.
კითხვაზე, უნდა მიაქციონ თუ არა ნატოს მოკავშირეებმა რუსეთის ბირთვულ მუქარას ყურადღება, რუტემ ხაზგასმით აღნიშნა, რომ არა.
„არა, ეს არ ღირს და ისინი ყურადღებას არ აქცევენ”, – თქვა მან.
ამასთან, რუტემ აღნიშნა, რომ ნატოს Steadfast Noon ბირთვული წვრთნები, რომელიც მომავალ კვირას დაიწყება, გამოავლენს ალიანსის მზადყოფნას, უპასუხოს კრემლის მუქარებს.
„ნატო ძლიერია. ჩვენ შეგვიძლია ნებისმიერ მოწინააღმდეგეს დავუპირისპირდეთ. გვაქვს ყველაფერი, რაც აუცილებელია ნატოს უსაფრთხოების უზრუნველსაყოფად, ნებისმიერი საფრთხის დასაძლევად. ჩვენ არასოდეს შეგვაშინებს ვინმე ნატოს მიღმა, რომელიც შეეცდება, დაგვემუქროს. ეს უსარგებლოა, სჯობს მან (პუტინმა) შეწყვიტოს ეს“, – ხაზგასმით აღნიშნა ალიანსის გენერალურმა მდივანმა.
მან ასევე ყურადღება გაამახვილა იმ ფაქტზე, რომ ახლა ქვეყნებისთვის მნიშვნელოვანია თავიანთი თავდაცვის შემოწმება და გაძლიერება.
„ჩვენ ასევე მკაფიოდ გავაგებინეთ ჩვენს მოწინააღმდეგეებს, რომ მზად ვართ, ვუპასუხოთ ნებისმიერ საფრთხეს,” – განაცხადა მარკ რუტემ.
ცნობისთვის, ნატო 14 ოქტომბრიდან ყოველწლიურ ბირთვულ წვრთნებს იწყებს.
