უკრაინის პრეზიდენტი ვოლოდიმირ ზელენსკი თავის გერმანელ კოლეგას, პრეზიდენტ ფრანკ-ვალტერ შტაინმაიერს შეხვდა. ამის შესახებ უკრაინის ლიდერმა Telegram-ზე განაცხადა.
როგორც ზელენსკიმ აღნიშნა, მოლაპარაკებების ძირითადი თემები იყო უსაფრთხოების ვითარება უკრაინაში, ენერგეტიკულ ქსელზე რუსეთის მუდმივი თავდასხმების ფონზე არსებული საჭიროებები და აქტიური საომარი მოქმედებები ფრონტზე, ასევე რეგიონული პარტნიორობის განვითარება.
„მადლობა გერმანიას ევროპული ლიდერობისთვის უკრაინისთვის გაწეული დახმარების ოდენობით, უპირველეს ყოვლისა, თავდაცვის სექტორში. მნიშვნელოვანია, შევინარჩუნოთ ის იმავე მაღალ დონეზე მომავალ წელსაც“, – წერს ზელენსკი.
ცნობისთვის, მანამდე უკრაინის პრეზიდენტი ბერლინში გერმანიის კანცლერ ოლაფ შოლცს შეხვდა.
უკრაინის ლიდერმა შოლცს „გამარჯვების გეგმის“ დეტალები გააცნო და განმარტა, რომ ეს არის „ხიდი“ პროდუქტიული სამშვიდობო სამიტისკენ – უკრაინის პოზიციის გასაძლიერებლად და ომის დასრულებისთვის პირობების შესაქმნელად.
შოლცმა მოლაპარაკებების დაწყებამდე ბრიფინგზე განაცხადა, რომ გერმანია ბელგიის, დანიისა და ნორვეგიის მხარდაჭერით უკრაინისთვის 1,4 მილიარდი ევროს ღირებულების დახმარების ახალ პაკეტს ამზადებს, რომელიც Iris-T-ისა და Skynex-ის საჰაერო თავდაცვით სისტემებს, Gepard-ის საზენიტო იარაღს, თვითმავალ არტილერიას, ჯავშანტექნიკას, საბრძოლო თვითმფრინავებს, რადარებსა და საბრძოლო მასალას მოიცავს.
