აშშ-ის ამჟამინდელმა პრეზიდენტმა ჯო ბაიდენმა, რომელსაც 20 იანვარს რესპუბლიკელი დონალდ ტრამპი ჩაანაცვლებს, გამოსამშვიდობებელ სიტყვაში უკრაინა თავისი საგარეო პოლიტიკური მიღწევების კონტექსტში ახსენა და აღნიშნა, რომ მისმა ადმინისტრაციამ „ნატო გააძლიერა“. ამის შესახებ ბაიდენმა თეთრი სახლის ოვალურ კაბინეტში სიტყვით გამოსვლისას განაცხადა, იუწყება CNN.
ბაიდენმა თავისი პრეზიდენტობის მიღწევები შეაჯამა და აღნიშნა, რომ იმედოვნებს, მისი მემკვიდრეობა და მისი ადმინისტრაციის მიღწევები მრავალი წლის განმავლობაში შენარჩუნდება.
„დრო დასჭირდება იმის განცდას, რაც ჩვენ ერთად გავაკეთეთ. მაგრამ თესლები უკვე დარგულია, ისინი გაიზრდებიან და აყვავდებიან ათწლეულების განმავლობაში“, – აღნიშნა ბაიდენმა.
მან თავისი პრეზიდენტობის მიღწევები ჩამოთვალა, მათ შორის ხანდაზმულებისთვის წამლების ფასების დაწევა, იარაღის უსაფრთხოების შესახებ კანონების მიღება და ვეტერანების დახმარება სამედიცინო დახმარების მიღებაში. თავის მიღწევებს შორის ბაიდენმა ნატოს გაძლიერებაც დაასახელა.
„საზღვარგარეთ ჩვენ გავაძლიერეთ ნატო, უკრაინა კვლავ თავისუფალია, ჩინეთთან კონკურენციას გავუსწარით და ბევრი სხვა რამ“, – აღნიშნა ბაიდენმა.
