აშშ-ის პრეზიდენტს დონალდ ტრამპს სურს, რაც შეიძლება მალე შეხვდეს რუსეთის პრეზიდენტს ვლადიმერ პუტინს. ის იმედოვნებს, რომ კრემლის ხელმძღვანელთან მოლაპარაკებები უკრაინაში ომის დასრულებას შეუწყობს ხელს, – ამის შესახებ აშშ-ის პრეზიდენტმა დონალდ ტრამპმა დავოსში მსოფლიო ეკონომიკურ ფორუმზე გამოსვლისას განაცხადა.
„სიამოვნებით შევხვდებოდი პუტინს რაც შეიძლება მალე, რათა დასრულდეს ეს ომი. მილიონობით სიცოცხლე, მშვენიერი ახალგაზრდები იღუპებიან ბრძოლის ველზე. ხალხი იღუპება“, – აღნიშნა მან.
მან ხაზგასმით აღნიშნა, რომ საუბარია არა ეკონომიკურ ზარალზე და ბუნებრივი რესურსების დანაკარგზე, არამედ ადამიანის სიცოცხლეზე.
„ქალაქები სათითაოდ ნადგურდება. ჩვენ უბრალოდ უნდა შევაჩეროთ ეს“, – განაცხადა აშშ-ის პრეზიდენტმა.
კითხვაზე, დაიდება თუ არა სამშვიდობო შეთანხმება დავოსის მომავალ ფორუმზე 2026 წელს, მან განაცხადა: „ეს არის რუსეთის გადასაწყვეტი, რადგან უკრაინა მზად არის“.
ტრამპმა კიდევ ერთხელ გაიმეორა, რომ უკრაინაში ომი არასოდეს დაიწყებოდა, იგი რომ შეერთებული შტატების პრეზიდენტად დარჩენილიყო.
„ვიცოდი, რომ პუტინი ამ ომს ჩემი თანამდებობის პერიოდში არასდროს დაიწყებდა და როცა წავედი, საშინელი ამბები დაიწყო“, – დასძინა ტრამპმა.
