არეულობა სერბეთის პარლამენტში: ოპოზიციონერმა დეპუტატებმა კვამლის კაფსულები ისროლეს და ცრემლსადენი გაზი გამოიყენეს.
Reuters-ის ინფორმაციით, ოპოზიციას ამ ფორმით სტუდენტურის პროტესტის მხარდაჭერა და ხელისუფლების პოლიტიკისადმი წინააღმდეგობის ჩვენება სურდათ.
Reuters-ის ცნობით, მთავრობის პოლიტიკის წინააღმდეგ პროტესტისა და საპროტესტო აქციებში მონაწილე სტუდენტების მხარდაჭერის ნიშნად სერბმა ოპოზიციონერმა დეპუტატებმა ქვეყნის პარლამენტის საგაზაფხულო სესიის პირველ დღეს კვამლის ხელყუმბარები ისროლეს და ცრემლსადენი გაზი გაუშვეს.
პარლამენტის სპიკერმა, ანა ბრნაბიჩმა განაცხადა, რომ პარლამენტში დაპირისპირების შედეგად ორი დეპუტატი დაშავდა, ხოლო ერთ-ერთმა დეპუტატმა, “სერბეთის პროგრესული პარტიიდან“, იასმინა ობრადოვიჩმა ინსულტი მიიღო და მისი მდგომარეობა კრიტიკულია.
“პარლამენტი მუშაობას და სერბეთის დაცვას გააგრძელებს“, – განაცხადა სერბეთის პარლამენტის სპიკერმა.
შეგახსენებთ, სერბეთში სამთავრობო კორუფციის წინააღმდეგ საპროტესტო აქციების ტალღა, რომელსაც სტუდენტები ხელმძღვანელობენ, მას შემდეგ დაიწყო, რაც გასული წლის ნოემბერში ქალაქ ნოვი სადში რკინიგზის სადგურის სახურავი ჩამოინგრა, რასაც 15 ადამიანი ემსხვერპლა. მომხდარის გამო ბრალი 13 ადამიანს წაუყენეს, მათ შორის სერბეთის ტრანსპორტის ყოფილ მინისტრს გორან ვესიჩს, რომელიც რკინიგზის სადგურის სახურავის ჩამონგრევიდან რამდენიმე დღეში გადადგა. საპროტესტო აქციების ფონზე იანვარში თანამდებობა სერბეთის პრემიერ-მინისტრმა, მილოშ ვუჩევიჩმაც დატოვა.
