აშშ-ის პრეზიდენტმა დონალდ ტრამპმა განაცხადა, რომ გეგმავს, ესაუბროს კრემლის ლიდერ ვლადიმერ პუტინს ცეცხლის 30 დღის განმავლობაში შეწყვეტის წინადადებაზე. ამის შესახებ მან ჟურნალისტებს თეთრ სახლთან 11 მარტს განუცხადა.
ტრამპმა დაადასტურა, რომ საუდის არაბეთში უკრაინულ და ამერიკულ დელეგაციებს შორის გამართული მოლაპარაკებების შემდეგ რუს კოლეგასთან ისაუბრებს.
„ტანგოსთვის ორი ადამიანია საჭირო, როგორც ამბობენ, ხომ ასეა? ასე რომ, ვიმედოვნებ, ის დათანხმდება და ეს, ვფიქრობ, უკვე 75% იქნება, დანარჩენი კი დოკუმენტის შედგენაა, მოლაპარაკებები ადგილზე პოზიციებთან დაკავშირებით და ა.შ.“, – განაცხადა მან.
აშშ-ის პრეზიდენტმა იმედი გამოთქვა, რომ ცეცხლის შეწყვეტა „უახლოეს რამდენიმე დღეში“ იმუშავებს.
„ვიცი, რომ ხვალ [12 მარტს] დიდი შეხვედრა გვექნება რუსებთან და იმედია, ამის შემდეგ ძალიან კარგი საუბრები იქნება“, – დასძინა ტრამპმა და არ დააკონკრეტა, რა შეხვედრა ჰქონდა მხედველობაში.
ცნობისთვის, 11 მარტს უკრაინისა და შეერთებული შტატების წარმომადგენლებმა საუდის არაბეთის ქალაქ ჯიდაში მოლაპარაკებები გამართეს, რომელიც დაახლოებით რვა საათს გაგრძელდა. ეს არის პირველი ოფიციალური შეხვედრა უკრაინელ და ამერიკელ ოფიციალურ პირებს შორის 28 თებერვალს თეთრ სახლში ვოლოდიმირ ზელენსკისა და დონალდ ტრამპს შორის მომხდარი დავის შემდეგ.
შეგახსენებთ, რომ შეხვედრის შემდეგ უკრაინა დათანხმდა ცეცხლის 30-დღიანი შეწყვეტის დაუყოვნებლივ შემოღებას, თუ რუსეთიც ასეთ ნაბიჯს გადადგამს. შეერთებული შტატები კი აღადგენს უკრაინისთვის სადაზვერვო ინფორმაციის გაზიარებას და განაახლებს სამხედრო დახმარების მიწოდებას.
აშშ-ის სახელმწიფო მდივანმა მარკო რუბიომ განაცხადა, რომ შეერთებული შტატები რუსეთს გადასცემს წინადადებას უკრაინაში „ცეცხლის 30-დღიანი შეწყვეტის“ შესახებ და იმედი აქვს, რომ შეთანხმება იქნება.
