პუტინი უკრაინაში საერთაშორისო მმართველობის შემოღების ინიციატივით გამოვიდა

რუსეთის პრეზიდენტმა ვლადიმერ პუტინმა განაცხადა, რომ შესაძლებელია უკრაინაში დროებითი საერთაშორისო მმართველობის შემოღების საკითხის განხილვა, მაგ. გაეროს ეგიდით. პუტინის აზრით, ეს უკრაინაში დემოკრატიული არჩევნების ჩატარებისა და ხელისუფლებაში ქმედუნარიანი და მოსახლეობის ნდობის მქონე მთავრობის მოყვანისთვის არის აუცილებელი. ინფორმაციას „ეხო კავკაზა“ ავრცელებს.

რუსეთის პრეზიდენტი ვლადიმერ პუტინი

მსგავსი იდეა პუტინმა რუსეთის ჩრდილოეთის ფლოტზე ვიზიტის დროს გამოთქვა. მისი თქმით, ასეთ მთავრობასთან მშვიდობის საკითხზე მოლაპარაკების წარმოება შესაძლებელი იქნებოდა.

პუტინმა კიდევ ერთხელ გაიმეორა, რომ მისი აზრით, უკრაინის დღევანდელი ხელისუფლება არალეგიტიმურია და მასთან რაიმე სახის დოკუმენტის ხელმოწერა საშიშია.

„ეს ერთ-ერთი ვარიანტია, თორემ სხვა ვარიანტებიც არსებობს“,- განაცხადა პუტინმა.

პუტინმა ასევე განაცხადა, რომ რუსეთი მიზანმიმართულად მიდის ამოცანების შესრულების გზით, რაც ე.წ. სპეციალური სამხედრო ოპერაციის დაწყების დროს გამოაცხადა. რუსეთის პრეზიდენტმა იმედი გამოთქვა, რომ რუსეთის ფედერაცია ამ მიზნებს მიაღწევს.