საქართველოს სტატისტიკის ეროვნული ცენტრის მონაცემებიდან გამომდინარე, საშუალოდ, ყოველი 10 ქორწინებიდან დაახლოებით 6 განქორწინებით დასრულდა. გარდა ამისა, ამავე ოფიციალური მონაცემებით, 2020 წლიდან მოყოლებული დღემდე ნარჩუნდება ტენდენცია, როდესაც ყოველწლიურად გარდაცვლილთა რიცხოვნობა ახალდაბადებულთა რაოდენობაზე მეტია.
დემოგრაფი ავთო სულაბერიძე „რეზონანსთან” აცხადებს, რომ განქორწინებების ზრდას რამდენიმე მიზეზი აქვს, თუმცა ეს საკითხი საფუძლიანად შესწავლილი ჯერ არაა. მთავარ მიზეზთა შორისაა ახალგაზრდა ცოლ-ქმარს შორის შეუთავსებლობა და მატერიალური პრობლემები.
გარდა ამისა, როგორც სულაბერიძე „რეზონანსთან” აცხადებს, განქორწინებების პროცესიც გამარტივებულია – ათი წლის წინ წყვილს მოსაფიქრებლად 2-3-თვიან პერიოდს აძლევდნენ, ახლა, ორივეს თანხმობის შემთხვევაში, განქორწინება მაშინვე შეუძლიათ.
ამასთან, მისივე თქმით, განქორწინება ხშირად ფიქტიურიცაა.
საქსტატის მონაცემები
საქსტატის ოფიციალურ ბოლო რვა წლის მონაცემებში ვკითხულობთ, რომ განქორწინების ამ წლების ყველაზე დაბალი მაჩვენებელი 2020 წელს იყო, ყველაზე მაღალი კი 2022 წელს, მას მოჰყვება 2023-2024 წლები.
საქსტატის მიხედვით, 2017 წელს განქორწინების შემთხვევები 10 222-ს შეადგენდა. 2018 წელს 10 288 იყო; 2019 წელს – 11 205; 2020 წელს – 7 643; 2021 წელს – 10 654; 2022 წელს – 14 098; 2023 წელს – 13 664 და 2024-ში – 13 520.
რაც შეეხება ქორწინებას, საქართველოს სტატისტიკის ეროვნული ცენტრის ბოლო რვა წლის მონაცემებით, ქორწინების ყველაზე მაღალი მაჩვენებელი 2022 წელს დაფიქსირდა, ყველაზე დაბალი კი 2020-ში.
საქატატის მიხედვით, 2017 წელს ქორწინებათა რაოდენობა შეადგენდა 23 684-ს. 2018 წელს ცოტა ნაკლები ფიქსირდება და შეადგენს 23 202-ს. 2019 წელსაც დაახლოებით იგივე დონეა შენარჩუნებული 23 285 ქორწინებით. 2020 წელს მაჩვენებელი მკვეთრად ეცემა და შეადგენს 16 359-ს. 2021 წელს კი ისევ ძველ მონაცემებთან ახლოს – 23 155-ია. 2022 წელს ყველაზე მაღალ ნიშნულზეა – 26 048. 2023 წელს კი ისევ დაღმასვლა იწყება – 22 275 და 2024 წელს – 21 653.
რაც შეეხება ცოცხლად დაბადებულთა რიცხოვნობას, მონაცემები ყოველწლიურად ეცემა და ასე გამოიყურება: 2017 წელი – 53 293 ბავშვი; 2018 წელი – 51 138 ბავშვი; 2019 წელი – 48 296; 2020 წელი – 46 520; 2021 წელი – 45 946; 2022 წელი – 42 301; 2023 წელი – 40 214; 2024 წელი – 39 483.
გარდაცვლილთა რიცხოვნობა კი საქსტატის მიხედვით ასეთია: 2017 წელი – 47 822; 2018 წელი – 46 524; 2019 წელი – 46 659; 2020 წელი – 50 537; 2021 წელი – 59 906; 2022 წელი – 49 118; 2023 წელი – 42 756; 2024 წელი – 43 971.
გაუარესების ძირითადი მიზეზები
დემოგრაფი ავთო სულაბერიძე „რეზონანსთან” აცხადებს, რომ განქორწინება, ძირითადად, ადრეულ ასაკში ხდება.
„განქორწინების ძირითადი მიზეზები არ შეგვისწვალია. განქორწინება ძალიან მარტივი გახდა. თან ეს განქორწინება ადრეულ ასაკებში ხდება, თუმცა ხშირად ფიქტიურიცაა. არის შეუთავსებლობა, ან კიდევ წინასწარ ძალიან მარტივი ჰგონიათ ოჯახის შექმნა და მერე წინააღმდეგობები ხვდებათ. იქ მატერიალური, საბინაო, თუ საყოფაცხოვრებო მიზეზებია, დედამთილ-მამამთილთან ურთიერთობები – ძირითადად ეს მიზეზებია, მაგრამ რომელი რა დოზითაა განქირწინების მიზეზი, მაგას ვერ გეტყვით, რადგან ეს სასამართლოს მეშვეობით კეთდება, რომლის მიზეზების მონაცემები ჩვენ არ გვაქვს.
„თან განქორწინებაც გამარტივებულია – მიხვალ დაწერ განცხადებას და განქორწინდები, თუ ორივე თანახმა ხართ. ადრე, ორ-სამთვიან პერიოდს აძლევდნენ, რომ იქნებ შერიგებულიყვნენ, მაგრამ დღეს ეს ნაკლებად ხდება”, – განაცხადა ავთო სულაბერიძემ.
მან შობადობის კლების ძირითად მიზეზეც ისაუბრა.
„ეს ძირითადად დამოკიდებულია ბავშვთა ყოლის მოთხოვნილობაზე. ბავშვთა ყოლის მოთხოვნილებას კი განაპირობებს სხვადასხვა პრობლემები, მაგალითად, კარიერა, გვიანი ქორწინებები და ა.შ. ჩვენთან ქორწინებები უკვე 30 წელს გადაცილებულია. პირველი ქორწინება უკვე 30 წლის ასაკში ხდება, როდესაც დაახლოებით ათი წლის წინ 23-25 წელი იყო. ეს ერთი მიზეზია, რომ შობადობა შემცირდა.
„არის კიდევ სწავლის და კარიერის მიზეზით გადავადებული ქორწინებები, ასევე ოჯახის დაძალების მიზეზით. წყვილი, რომელიც დაქორწინებას აპირებს, გადაავადებს ხოლმე ქორწინებას, რომ მომავალი ოჯახისთვის უკეთესი პირობები შექმნას.
„მოკვდავობა კი იმის გამო გაიზარდა, რომ 60-70 წელს გადაცილებული მოსახლეობის ზრდა გვაქვს. უფრო ადრეული ასაკების ჯგუფებში არ არის ისეთი მაღალი მოკვდავობა. დღეს მოკვდავობის მაღალი მაჩვენებელი ძირითადად მოსახლეობის დაბერების შედეგია”, – განაცხადა ავთო სულაბერიძემ „რეზონანსთან”.