ამერიკელი პროფესორის ჯეფრი საქსის განცხადებით, ევროპის პოლიტიკა „დიფ სთეითის“ გავლენის ქვეშაა, მსხვილი ევროპული სახელმწიფოების ლიდერები კი „დიფ სთეითის“ გავლენით მოქმედებენ.
ანალიტიკოსი განმარტავს, რომ ევროკავშირი ბოლო წლებში დისფუნქციური გახდა, რადგან მისი ლიდერები სამშვიდობო დიპლომატიისკენ სწრაფვის ნაცვლად ომის წამქეზებლად იქცნენ და ხალხის მხარდაჭერა დაკარგეს.
საქსის შეფასებით, აღმოსავლეთ ევროპაში არიან ევროკავშირის კანდიდატი ქვეყნები, რომლებიც ხმამაღლა ლაპარაკობენ მშვიდობის აუცილებლობასა და „დიფ სთეითის“ გავლენებზე, თუმცა საჭიროა, რომ ისეთმა მსხვილმა სახელმწიფოებმა თქვან სიმართლე, როგორიცაა გერმანია, საფრანგეთი თუ გაერთიანებული სამეფო.
„ევროპელი ლიდერები რაც მეტად ემხრობიან, მით ნაკლები მხარდამჭერი ჰყავთ. მოსახლეობას მშვიდობა და დიპლომატია სურს და არა ომი და სანქციების რეჟიმი, რომელიც ბუმერანგის პრინციპით უბრუნდებათ მოქალაქეებს. თუმცა ლიდერები შეპყრობილები არიან ამ იდეებით. ევროპელი ლიდერების მთავარ საქმიანობად დილა-საღამოს ზელენსკისთან შეხვედრები იქცა. თითქოს სხვა საქმე არ ჰქონდეთ.
ვფიქრობ, ევროპული პოლიტიკის დიდი ნაწილი რეალურად „დიფ სთეითის“ დაზვერვის სააგენტოს პოლიტიკაა. იგივე ითქმის ამერიკის შეერთებულ შტატებზეც. ევროპელი ლიდერები ყოველდღე მართავენ შეხვედრებს, რომ ომი გაახანგრძლივონ, რაც დაუჯერებელია. ამერიკული და ევროპული „დიფ სთეითიც“ უარს აცხადებს იმის დანახვაზე, რომ არსებობს ალტერნატიული გზა. რომ არაა აუცილებელი უკრაინა ნატოში გაწევრიანდეს, არამედ უმჯობესია უკრაინის ნეიტრალიტეტი.
მშვიდობის მიღწევა არ არის მარტივი. ტრამპი ცდილობს, თუმცა საჭიროა, რომ ევროპის ერთი მსხვილი სახელმწიფოს ლიდერმა გამოიჩინოს გონიერება და თქვას სიმართლე. არიან პატარა ქვეყნები, მათ შორის კანდიდატი სახელმწიფოები აღმოსავლეთ ევროპაში, რომლებიც ამბობენ სიმართლეს, თუმცა ველოდებით გერმანიის, საფრანგეთისა და ბრიტანეთის ლიდერებს, რომ სიმართლე თქვან“, – აღნიშნა საქსმა.
