„დონალდ ტრამპის მიერ რუსეთის წინააღმდეგ ახალი სანქციების დაწესებაზე უარის თქმამ ევროპელი ლიდერები შოკში ჩააგდო“, – ამის შესახებ გერმანული გამოცემა BILD-ი საკუთარ წყაროებზე დაყრდნობით წერს.
გამოცემის ცნობით, ვლადიმერ პუტინთან საუბრის შემდეგ, ტრამპმა ევროკავშირის ლიდერებთან სატელეფონო საუბარი გამართა, რომლის დროსაც მან ფაქტობრივად გამოკვეთა უკრაინაში ომთან დაკავშირებით თავისი პოლიტიკის მკვეთრი ცვლილება.
BILD-ის წყაროები აცხადებენ, რომ ტრამპი აღარ მოითხოვს პუტინისგან 30-დღიან ცეცხლის შეწყვეტაზე დათანხმებას და არ აპირებს რუსეთის წინააღმდეგ ახალი სანქციების დაწესებას.
წყაროების ცნობით, ტრამპთან სატელეფონო საუბრის მონაწილეები (გერმანიის კანცლერი, საფრანგეთის პრეზიდენტი, ევროკომისიის პრეზიდენტი, იტალიის პრემიერ-მინისტრი და უკრაინის პრეზიდენტი ვოლოდიმირ ზელენსკი) შოკირებულები იყვნენ ტრამპის განცხადებით, რომ „რუსეთი და უკრაინა გამოსავალს ერთმანეთთან მოძებნიან“.
BILD-ის ერთ-ერთი წყარო ამბობს, რომ ამ განცხადების შემდეგ ვერავინ გაბედა იმის გარკვევაც კი, ნიშნავდა თუ არა ეს აშშ-ს საბოლოო უარს უკრაინის მხარდაჭერაზე.
წყაროების ცნობით, ბერლინი შიშობს, რომ ვაშინგტონი სრულად უარს იტყვის კონფლიქტში თავის ამჟამინდელ როლზე და გააუქმებს ამერიკულ სანქციებს რუსეთის წინააღმდეგ.
