20 წელიწადში უკრაინის ეკონომიკამ შესაძლოა, რუსეთის ეკონომიკას გადაასწროს. ეს განცხადება აშშ-ის ფინანსთა მინისტრმა სკოტ ბესენტმა კონგრესში მოსმენის დროს გააკეთა.
ამერიკელი მინისტრის თქმით, უკრაინის სტაბილური ეკონომიკა გრძელვადიან პერსპექტივაში უკრაინის საუკეთესო დაცვა იქნება – ეს არის ის, რასაც ის და აშშ-ის პრეზიდენტი დონალდ ტრამპი ფიქრობენ. მან ხაზგასმით აღნიშნა, რომ ეროვნული უსაფრთხოება ეკონომიკური უსაფრთხოებაა.
ბესენტმა ასევე გაიხსენა, რომ როდესაც ბერლინის კედელი დაინგრა, უკრაინისა და პოლონეთის ეკონომიკები იდენტური იყო, მაგრამ ახლა პოლონეთის ეკონომიკა სამჯერ აღემატება უკრაინის ეკონომიკას.
„მე მჯერა, რომ ოცი წლის შემდეგ უკრაინის ეკონომიკა ეფექტური მენეჯმენტის, [უკრაინასა და აშშ-ს შორის] ასეთი პარტნიორობის და გლობალური ინვესტიციების წყალობით შეიძლება რუსეთის ეკონომიკაზე დიდი გახდეს. და მე ვფიქრობ, რომ ეს ძალიან ძლიერი შემაკავებელი ფაქტორი იქნება ნებისმიერი პირისთვის, ვინც არ უნდა მართავდეს რუსეთს“, – ხაზგასმით აღნიშნა მან.
ბესენტმა დასძინა, რომ რომში მალე დიდი კონფერენცია გაიმართება, სადაც უკრაინის აღდგენაზე ისაუბრებენ. ვაშინგტონი მსოფლიო ბანკს მოუწოდებს, ყურადღება ამ საკითხზე გაამახვილოს.
ამავდროულად, ამერიკელმა მინისტრმა ხაზგასმით აღნიშნა, რომ არცერთ ქვეყანას, რომელიც რუსეთს უკრაინის წინააღმდეგ ომში დაეხმარა – ფულით, სამხედრო ძალებით, ან რუსული იარაღისთვის საჭირო აღჭურვილობით – არ ექნება უფლება, უკრაინის აღდგენის პროცესში მონაწილე იყოს.
„თქვენ არ შეგიძლიათ, გაანადგუროთ ქვეყანა, გაანადგუროთ ადამიანები, გაანადგუროთ სიცოცხლეები და შემდეგ მიიღოთ ფული მისი აღდგენისთვის“, – აღნიშნა ბესენტმა.
