დამწვარი სახლები, დაზიანებული ავტომობილები და ფერფლად ქცეული ქუჩები – ასეთი სურათია ირანში დღეს, მას შემდეგ რაც ისრაელმა ირანის ბირთვულ ლოკაციებზე თავდასხმა განახორციელა.
თეირანის ჩრდილოეთით მდებარე შენობები, ღამით განხორციელებული საჰაერო დარტყმების შედეგად ნახევრად ჩამოშლილია.
დილიდან საგანგებო რეჟიმში მუშაობს სასწრაფო სამედიცინო დახმარება.
ინტერნეტში ვრცელდება ფოტო და ვიდეო მასალები, სადაც ჩანს, რომ დედაქალაქ თეირანში გამთენიისას შენობებიდან კვამლი ამოდიოდა.
ერთ-ერთ ვიდეოში ისმის მამაკაცის ხმა: „დრო დილის 3:37 საათია“, შემდეგ კი დასძენს: „საცხოვრებელი კომპლექსი დაბომბეს“.
მაშველები ჩამოშლილი კორპუსების ნანგრევებში ადამიანებს ეძებდნენ.
ისრაელის თავდასხმების სრული შედეგები ჯერ კიდევ უცნობია. ირანმა მთლიანი საჰაერო სივრცე დახურა.
-
“ირანელი ხალხი თავდასხმის შემდეგ შოკშია…“
პოლიტიკური ანალიტიკოსის თქმით, ადამიანები ირანში თავდასხმით შოკირებულები არიან.
როგორც CNN-ს საერთაშორისო პოლიტიკის ცენტრის უფროსმა მკვლევარმა ნეგარ მორტაზავიმ განუცხადა, „ხალხი იუწყებოდა რყევის, აფეთქებების და თვითმფრინავების ფრენის ხმების შესახებ, შემდეგ კი კვამლისა და აფეთქებების ხმაზე იღვიძებდნენ“, – თქვა მან.
„როგორც ჩანს, ხალხი განადგურებული და შოკირებული იყო თავდასხმით“, – დასძინა მან.
აღსანიშნავია, რომ ირანს ირან-ერაყის ომის შემდეგ ამ მასშტაბის სამხედრო ოპერაციები არ უნახავს თავის ტერიტორიაზე.
კატარის აეროპორტში ფრენების საინფორმაციო დაფაზე ჩანს, რომ მეზობელი ერაყის მიმართულებით და იქიდან რეისები ერთმანეთის მიყოლებით გაუქმებულია.
ირანმა ოფიციალურად დახურა თავისი საჰაერო სივრცე ისრაელის უპრეცედენტო თავდასხმების სერიის შემდეგ.
ირანზე განხორციელებული თავდასხმის შემდეგ, მსოფლიოს მასშტაბით, ნავთობის ფასმა 10%-ით უკვე მოიმატა.
“ტრეიდერები“ შეშფოთებულნი არიან, რომ კონფლიქტმა შეიძლება შეაფერხოს ენერგორესურსებით მდიდარი რეგიონიდან მომარაგება.
