ერევანში სომხური წარმოშობის რუსი მილიარდერი, “ტაშირ ჯგუფის“ ხელმძღვანელი სამველ კარაპეტიანი დააკავეს. მას ხელისუფლების ხელში ჩაგდების მოწოდებისთვის ბრალი უკვე წარუდგინეს. კარაპეტიანის დაკავების მოთხოვნით სასამართლოს საგამოძიებო კომიტეტმა მიმართა, რის საფუძველზეც 18 ივნისის 3 საათისთვის ის საკუთარ სახლში დააკავეს. მანამდე, 17 ივნისს სომეხმა სამართალდამცავებმა მის სახლში ჩხრეკა ჩაატარეს.
ოლიგარქი სომხეთის ეკლესიის მხარდაჭერის საბაბით პრემიერ-მინისტრ ნიკოლ ფაშინიანის ხელისუფლებას დაუპირისპირდა. ის ამბობდა, თითქოს, ადამიანთა მცირე ჯგუფი ეკლესიას ებრძოდა, რასაც თავისებურად შეეწინააღმდეგებოდა. ფაშინიანმა სოციალურ ქსელში რუსეთში მოღვაწე სომეხ ოლიგარქს უპასუხა, რომ სომხეთი კალუგის ოლქის რომელიმე სოფელი არ არის.
Forbes-ის 146 რუსი მილიარდერის 2025 წლის რეიტინგში კარაპეტიანი 44-ე ადგილზეა, რომლის ქონებაც 3.2 მლრდ დოლარად არის შეფასებული.
სომხეთის პრემიერ-მინისტრმა ნიკოლ ფაშინიანმა განაცხადა, რომ კარაპეტიანის “ტაშირ ჯგუფის“ საკუთრებაში არსებული “სომხეთის ელექტროქსელების“ ნაციონალიზაცია უნდა მოხდეს.
მილიარდერის ადვოკატის, არმენ ფეროიანის თქმით, სასამართლომ კარაპეტიანს ორთვიანი წინასწარი პატიმრობა შეუფარდა. მან ჟურნალისტებს განუცხადა, რომ დაცვის მხარე გადაწყვეტილებას გაასაჩივრებს.
“სამველ კარაპეტიანს უკანონო ბრალდება წაუყენეს, რომელსაც ჩვენი კლიენტი არ ეთანხმება. ისინი მას, სავარაუდოდ, ძალაუფლების ხელში ჩაგდების საჯაროდ მოწოდებაში ადანაშაულებენ და სწორედ ამას ეფუძნება ბრალდება. ამას რეალობასთან აბსოლუტურად არაფერი აქვს საერთო“, – განაცხადა ადვოკატმა.
-
“კამპანია ეკლესიის წინააღმდეგ“
17 ივნისს, უსაფრთხოების ძალები ერევანში მდებარე კარაპეტიანის სახლის ჩხრეკისთვის მივიდნენ. ადვოკატის თქმით, ბიზნესმენის სახლთან 50-ზე მეტი ადამიანი დააკავეს. სომხეთის შინაგან საქმეთა სამინისტრომ ნაწილობრივ დაადასტურა ეს ინფორმაცია და განაცხადა, რომ დაკავებულია რამდენიმე ადამიანი.
თავად მილიარდერმა ეს მოვლენები დაუკავშირა იმ ფაქტს, რომ ის ხმამაღლა გამოვიდა სომხური სამოციქულო ეკლესიის დასაცავად, რომლის ხელმძღვანელობაც მკვეთრად გააკრიტიკა პრემიერ-მინისტრმა ნიკოლ ფაშინიანმა.
სომხური მედიის ცნობით, ჩხრეკამდე რამდენიმე საათით ადრე ბიზნესმენმა განაცხადა, რომ “მზად იყო ებრძოლა “ეკლესიის საქმეებში ჩარევის საწინააღმდეგოდ”.
მანამდე კარაპეტიანმა ჟურნალისტებს განუცხადა, რომ “მცირე ჯგუფი, რომელმაც დაივიწყა სომხური ეკლესიის ათასწლიანი ისტორია, თავს დაესხა სომხურ ეკლესიას და სომეხ ხალხს“.
“მთელი ჩემი ძალით ვიბრძოლებ სომეხი ხალხის სალოცავებისთვის, სადაც არ უნდა ვიყო და რაც არ უნდა მოხდეს. არავის მივცემ უფლებას ხელყოს ჩვენი სალოცავები“, – თქვა ბიზნესმენმა.
ამ განცხადებიდან მალევე, კარაპეტიანის სახლი პოლიციამ ალყაში მოაქცია.
შეგახსენებთ, რომ სომხეთის სამოციქულო ეკლესიასა და ქვეყნის მთავრობას შორის ურთიერთობა ბოლო ხანს უკიდურესად დაძაბულია.
შეიძლება ითქვას, რომ “ცეცხლი” პირველმა ფაშინიანმა გახსნა.
კერძოდ, 29 მაისს გამართული მთავრობის სხდომაზე სომხეთის პრემიერმა განაცხადა, რომ სომხური ეკლესია დაემსგავსა “საკუჭნაოს, სადაც ნაგავი ინახება”. ამას სასულიერო პირებისა და მრევლის აღშფოთება მოჰყვა. მათ ფაშინიანი სომხური ეკლესიის მიზანმიმართულად დასუსტების მცდელობაში და ლამის აზერბაიჯანის მოკავშირეობაში დაადანაშაულეს.
საპასუხოდ ფაშინიანმა სოციალურ ქსელში სკანდალური პოსტი გამოაქვეყნა:
“თუ აღმოჩნდება, რომ გარეგინ II-მ მართლაც დაარღვია დაუქორწინებლობის აღთქმა და შვილი ჰყავს, ის ვერ იქნება ყოველთა სომეხთა კათოლიკოსი. ამას ვაცხადებ ყველას პირადი და ოჯახური ცხოვრების ხელშეუხებლობის უფლებისადმი სრული პატივისცემით, მაგრამ ყოველთა სომეხთა კათოლიკოსს არ შეუძლია ასეთი პირადი ცხოვრება ჰქონდეს. ამ საკითხს ვსვამ როგორც სომხური სამოციქულო ეკლესიის მიმდევარი, რადგან სულიერი უსაფრთხოების საკითხს ვხედავ და ამაზე სომხეთის პრემიერ-მინისტრის რანგში ვსაუბრობ. ვხედავ სახელმწიფო უსაფრთხოების საკითხს. წმინდა ეჩმიაძინმა ამ სიტუაციასთან დაკავშირებით პოზიცია უნდა გამოხატოს, რის შემდეგაც საკითხის დამატებითი განმარტება მოხდება”, – განაცხადა ნიკოლ ფაშინიანმა.
2 ივნისს წმინდა ეჩმიაძინის მთავარ საკათედრო ტაძარში სრულიად სომეხთა კათოლიკოსის, გარეგინ II-ის ხელმძღვანელობით უმაღლესი სასულიერო საბჭოს სხდომა გაიმართა, რომელზეც ფაშინიანს უპასუხეს.
მათი თქმით, სომხური ეკლესიის მოთხოვნა, ფაშინიანის გადადგომის შესახებ, ძალაში რჩება.
თავის მხრივ ნიკოლ ფაშინიანმა მოუწოდა სომხური სამოციქულო ეკლესიის მრევლს, მონაწილეობა მიიღონ ახალი პატრიარქის არჩევის ორგანიზებაში. პრემიერს სურს, შეიქმნას საკოორდინაციო ჯგუფი ამ საკითხის გადასაჭრელად.
-
სომხეთის ელექტროქსელების ნაციონალიზაციის საკითხი
ამასობაში, პრემიერ-მინისტრმა ნიკოლ ფაშინიანმა განაცხადა, რომ “სომხეთის ელექტროქსელების“, რომელიც “ტაშირჯგუფის” საკუთრებაშია, ნაციონალიზაცია უნდა მოხდეს.
“მე მჯერა, რომ დადგა დრო, როდესაც “სომხეთის ელექტროქსელების“ ნაციონალიზაცია უნდა მოხდეს. ეს სწრაფად დასრულდება, მოვუწოდებ ENA-ს ყველა თანამშრომელს, კეთილსინდისიერად შეასრულონ თავიანთი სამუშაო მოვალეობები“, – წერს ფაშინიანი.
“ტაშირმა“ “სომხეთის ელექტროქსელების“ და “რაზდანის თბოელექტროსადგურის“ აქციების 100% 2016 წელს, “ინტერ რაოსთან“ გარიგების შედეგად მიიღო.
სამველ კარაპეტიანი “ტაშირის“ კომპანიების ჯგუფის პრეზიდენტია, რომელიც ასევე ფლობს რუსეთში Rio-ს სავაჭრო და გასართობ ცენტრებს.
რუსეთის საგარეო საქმეთა სამინისტროს პრესსპიკერმა მარია ზახაროვამ ადრე განაცხადა, რომ მოსკოვი აკვირდება რუსეთის მოქალაქე სამველ კარაპეტიანის გარშემო არსებულ ვითარებას. მისი თქმით, თუ საჭირო გახდა, რუსეთი მას საჭირო დახმარებას გაუწევს.