რამდენიმე საათის წინ ამოვარდნილმა ძლიერმა ქარმა ქალაქ ახმეტაში დააზიანა ქალაქის ინფრასტრუქტურა, რამდენიმე კერძო სახლსა და კომერციულ ფართს მთლიანად მოხადა სახურავი. ქარიშხალმა მოგლიჯა მრავალწლიანი ხეები და ჩახერგა საავტომობილო გზები.
სტიქიის შედეგად დაზიანდა ელექტროგადამცემი ხაზები და საყრდენები, რის გამოც ქალაქ ახმეტას და რამდენიმე სოფელს ელექტროენერგია არ მიეწოდება.
ადგილზე მობილიზებულნი არიან სახანძრო-სამაშველო სამსახურის წარმომადგენლები, მერიის შესაბამისი სამსახურები. მიმდინარეობს გზის გაწმენდითი სამუშაოები.
ახმეტის მუნიციპალიტეტის მერის პირველი მოადგილის, ვაჟა ნასყიდაშვილის ინფორმაციით, სტიქიის შედეგად გამოწვეული ზარალის მაშტაბის შესახებ ინფორმაცია ხვალ, დღის პირველ ნახევარში გახდება ცნობილი. სამუშაოები მთელი ღამის განმავლობაში გაგრძელდება.
