აშშ-ის მთავრობა გეგმავს, გარკვეული ქვეყნებიდან ჩამოსული ტურისტებისა და საქმიანი მოგზაურებისგან შესვლისთვის 15 000 აშშ დოლარამდე დეპოზიტის გადახდა მოითხოვოს. ეს გირაო იმის უზრუნველსაყოფადაა, რომ მოგზაურებმა „შეასრულონ ვიზების პირობები და დროულად დატოვონ შეერთებული შტატები“, ნათქვამია აშშ-ის ფედერალურ რეესტრში გამოქვეყნებულ განცხადებაში. უვიზო პროგრამის (VWP) მონაწილე ქვეყნებიდან ჩამოსული ვიზიტორები არ დაზარალდებიან. გერმანია, ევროკავშირის ქვეყნების უმეტესობასთან ერთად, მის 42 წევრს შორისაა.
გავრცელებული ინფორმაციით, ეს ღონისძიება 20 აგვისტოს ამოქმედდება და თავდაპირველად თითქმის ერთი წლის განმავლობაში საპილოტე პროექტის ფარგლებში გამოიცდება. სახელმწიფო დეპარტამენტის პრესსპიკერმა განაცხადა, რომ ახალი რეგულაცია თავდაპირველად აფრიკის ქვეყნების, მალავისა და ზამბიის მოქალაქეებზე გავრცელდება, რომლებსაც აქვთ საქმიანი ან ტურისტული ვიზები – მათ გირაოს გადახდა მოუწევთ.
სამიზნე აუდიტორია იქნება იმ ქვეყნებიდან ჩამოსული ვიზიტორები, სადაც ვიზების ვადის გადაცილების მაღალი მაჩვენებელია. სამშობლოს უსაფრთხოების დეპარტამენტის 2023 წლის ანგარიშში ჩამოთვლილია ისეთი ქვეყნები, როგორიცაა ჩადი, ერიტრეა, მიანმარი, იემენი და ჰაიტი.
დარღვევებისთვის შემთხვევაში, გირაოს თანხის დაბრუნება შეუძლებელი იქნება.
აშშ-ის მთავრობის ცნობით, გირაოს ოდენობა პასუხისმგებელი საკონსულო თანამდებობის პირების შეხედულებისამებრ განისაზღვრება. შესაძლო ოდენობაა 5,000 აშშ დოლარი, 10,000 აშშ დოლარი ან 15,000 აშშ დოლარი. ვიზის პირობების დამრღვევი პირი თანხას ვერ დაიბრუნებს. აღინიშნა, რომ დაკავებული გირაო შეიძლება გამოყენებულ იქნას აშშ-ის მთავრობის ხარჯების დასაფარად დეპორტაციის პროცედურებისთვის.
გირაოს შემოღების იდეა დონალდ ტრამპმა ჯერ კიდევ თავისი პირველი საპრეზიდენტო ვადის დასასრულს გააჟღერა, თუმცა მაშინ კოვიდმა და მსოფლიოს მასშტაბით შეჩერებულმა მოგზაურობამ აზრი დაუკარგა ამ ინიციატივას.
ასე და ამრიგად, ჯერ ყველაფერი აფრიკული ქვეყნებით იწყება, მაგრამ სავსებით შესაძლებელია, მომავალში საქართველოს მოქალაქეებისთვის დაწესდეს აშშ-ში შესვლის სანაცვლოდ გირაოს გადახდა. ბუნებრივია, ეს იმ შემთხვევაში მოხდება, თუკი საქართველოდან აშშ-ში შესული მოქალაქეები კვლავინდებურად ხშირად დაარღვევენ სავიზო პირობებს და ამერიკაში უნებართვოდ, ვიზის ვადის გასვლის შემდგომ, მასობრივად დარჩენას განაგრძობენ.