სრულიად ლოგიკურია, რომ ვლადიმერ პუტინისა და დონალდ ტრამპის ასეთი მნიშვნელოვანი სამიტი ალასკაზე გაიმართება, – ამის შესახებ რუსეთის პრეზიდენტის, ვლადიმერ პუტინის თანაშემწემ, იური უშაკოვმა განაცხადა.
„რუსეთი და აშშ ახლო მეზობლები არიან, რომლებიც ერთმანეთს ესაზღვრებიან. სრულიად ლოგიკურია, რომ ჩვენი დელეგაცია უბრალოდ ბერინგის სრუტეს გადაუფრენს და ორი ქვეყნის ლიდერების ასეთი მნიშვნელოვანი და მოსალოდნელი სამიტი ალასკაზე გაიმართება“, – განაცხადა უშაკოვმა.
მისი თქმით, შეხვედრაზე ლიდერები “უკრაინის კრიზისის ხანგრძლივი და მშვიდობიანი მოგვარების ვარიანტებს განიხილავენ“.
ამასთან, უშაკოვის ცნობით, დონალდ ტრამპსა და ვლადიმერ პუტინს შორის მომდევნო შეხვედრა, შესაძლოა, რუსეთში გაიმართოს.
“თუ მომავალზეც ვიფიქრებთ, მაშინ მიზანი ვლადიმირ პუტინსა და დონალდ ტრამპს შორის შემდეგი შეხვედრის რუსეთის ტერიტორიაზე ჩატარება უნდა იყოს. შესაბამისი მოწვევა აშშ-ის პრეზიდენტს უკვე გადაეცა“, – აღნიშნა უშაკოვმა.
დონალდ ტრამპის ინფორმაციით, რუსეთსა და უკრაინას შორის სამშვიდობო შეთანხმების ფარგლებში ტერიტორიების გაცვლა მოხდება.
“საუბარია ტერიტორიებზე, რომელთა გამოც სამწელიწადნახევარია სასტიკი ბრძოლები მიმდინარეობს და ბევრი უკრაინელისა და რუსის სიცოცხლე შეიწირა. ახლა დაგეგმილია ამ მიწების ნაწილის დაბრუნება და ორმხრივი გაცვლის განხორციელება. პროცესი რთულია, მაგრამ ჩვენ დავაბრუნებთ ტერიტორიების ნაწილს, გარკვეულ გაცვლებს განვახორციელებთ და ეს ორივე მხარისთვის მომგებიანი იქნება“, – განაცხადა აშშ-ის პრეზიდენტმა.
მისი თქმით, უკრაინის პრეზიდენტი, ვოლოდიმირ ზელენსკი უკრაინაში ომის დასასრულებლად „რაღაცაზე ხელის მოსაწერად მზად უნდა იყოს“.
“ჩვენ რომ არ ჩავრეულიყავით რუსეთსა და უკრაინას შორის ომი მსოფლიო ომად გადაიქცეოდა. ეს მე შევაჩერე. ახლა ერთადერთი კითხვაა დარჩენილი, თუ როდის მოგვარდება ეს. შესაძლოა ეს ძალიან მალე მოხდეს“, – აღნიშნა აშშ-ის პრეზიდენტმა.
ამ დროს უკრაინის პრეზიდენტი ზელენსკი უკვე უპირისპირდება ტრამპის გეგმას. „უკრაინის ტერიტორიულ საკითხზე პასუხი უკრაინის კონსტიტუციაშია, ჩვენს მიწას ოკუპანტებს არ მივცემთ“, – თქვა ზელენსკიმ.
„მათაც კი, ვინც რუსეთს უჭერს მხარს, იციან, რომ ის ბოროტებას სჩადის. რა თქმა უნდა, ჩვენ არ მივცემთ რუსეთს ჯილდოს იმისთვის, რაც მან გააკეთა. უკრაინელი ხალხი იმსახურებს მშვიდობას. თუმცა, ყველა პარტნიორმა უნდა გაიგოს, რა არის ღირსეული მშვიდობა. ეს ომი უნდა დასრულდეს და ის რუსეთმა უნდა დაასრულოს. რუსეთმა დაიწყო და აჭიანურებს, არ ითვალისწინებს რაიმე ვადას და ეს არის პრობლემა. უკრაინის ტერიტორიულ საკითხზე პასუხი უკვე უკრაინის კონსტიტუციაშია. არავინ გადაუხვევს და არც შეუძლია გადაუხვიოს ამას . უკრაინელები არ გადასცემენ თავიანთ მიწას ოკუპანტს“, – განაცხადა ზელენსკიმ.
