ნორვეგიის პრინცესა მეტე-მარიტის შვილი მარიუს ბორგ ჰოიბი, რომელიც მას ტახტის მემკვიდრე ჰოკონზე დაქორწინებამდე ეყოლა, გამოძიების ქვეშ იმყოფება მას შემდეგ, რაც 2024 წლის 4 აგვისტოს მეგობარ გოგონაზე თავდასხმის ბრალდებით დააკავეს.
- გაუპატიურების ოთხი ეპიზოდის გარდა, ნორვეგიის პრინცს ბრალად ედება ყოფილი პარტნიორის მიმართ ოჯახური ძალადობა, ძალადობისა და საზოგადოებრივი წესრიგის დარღვევის რამდენიმე შემთხვევა, ვანდალიზმი და სხვა ყოფილ პარტნიორთან მიმართებით გაცემული შემაკავებელი ორდერის დარღვევა.
“ბრალდებაში ჩამოთვლილი დანაშაულებისთვის მაქსიმალური სასჯელი 10 წლამდე თავისუფლების აღკვეთას შეადგენს. ის ფაქტი, რომ მარიუს ბორგ ჰოიბი სამეფო ოჯახის წევრია, ბუნებრივია, არ უნდა ნიშნავდეს, რომ მასთან უფრო შემწყნარებლურად ან უფრო მკაცრად უნდა მოვექცეთ, ვიდრე სხვათა შემთხვევაში,“ – განაცხადა პროკურორმა სტურლა ჰენრიკსბომ.
ოთხი გაუპატიურების შემთხვევა, რომლებშიც ჰოიბია ბრალდებული, სავარაუდოდ 2018, 2023 და 2024 წლებში მოხდა. ბრალდებულმა უკვე აღიარა 2024 წლის აგვისტოს ჩადენილი თავდასხმისა და ვანდალიზმის ის ფაქტები, რის გამოც პირველად დააკავეს.
საჯარო განცხადებაში, რომელიც მან დაკავებიდან 10 დღის შემდეგ გააკეთა ნათქვამია რომ “კამათის შემდეგ ალკოჰოლისა და კოკაინის ზემოქმედების ქვეშ იმყოფებოდა რადგან მენტალური პრობლემები ჰქონდა და დიდხანს ებრძოდა ნარკოტიკების მოხმარებას.“
ჰოიბი მედიის ყურადღების ცენტრში 4 წლის ასაკში მოექცა, მას შემდეგ, რაც დედამისი ნორვეგიის ტახტის მემკვიდრეს გაჰყვა ცოლად, ვისთანაც მოგვიანებით კიდევ ორი შვილი შეეძინა.
