რუსეთის ფედერაციის მთავრობა ეროვნული მესენჯერის – Messenger Max-ის ელექტრონულ მოწყობილობებზე წინასწარ დაინსტალირებული აპლიკაციების სიაში შეიტანს. აღნიშნულის შესახებ რუსული მედია რუსეთის მინისტრთა კაბინეტის პრესსამსახურზე დაყრდნობით იტყობინება.
როგორც რუსული მედია წერს, Messenger Max-ი „ვკონტაქტეს“ ჩაანაცვლებს. შესაბამისი ცვლილებები კი 1-ელი სექტემბრიდან ამოქმედდება.
„გარდა ამისა, 1-ელი სექტემბრიდან RuStore წინასწარ იქნება დაინსტალირებული iOS და HyperOS ოპერაციული სისტემების (OS) მოწყობილობებზე. აქამდე, ადგილობრივი აპლიკაციების მაღაზიის წინასწარი ინსტალაცია მხოლოდ Android და HarmonyOS მოწყობილობებზე იყო სავალდებულო“, – წერს რუსული მედია.
ინფორმაციისთვის, რუსეთის ფედერაციაში ეროვნული მესენჯერის შექმნის შესახებ კანონი ივნისში მიიღეს.
რუსული მედიის ცნობით, Max-ის პლატფორმის პირველი ვერსია VK-მ 2025 წლის მარტის ბოლოს წარადგინა; ივნისის ბოლოსთვის მომხმარებელთა რაოდენობამ 1 მილიონი შეადგინა.
