21-22 აგვისტოს უკრაინამ კამიკაძე დრონებით რუსეთის ბრიანსკის ოლქში ნავთობსადენ “დრუჟბას” ნავთობსადგურ “უნეჩაზე” მიიტანა იერიში ინფორმაცია “ტელეგრამში” გაავრცელა უკრაინის უპილოტო სისტემების ძალების მეთაურმა რობერტ ბროვდიმ.
-
“ნავთობსადგური “უნეჩა” ნანგრევებად იქცა, შეეცადეთ ისევ შეაკეთოთ. უპილოტო სისტემების ძალების ფრინველების მოგზაურობა ნავთობის ობიექტებში გრძელდება”, – წერს ის.
აღსანიშნავია. რომ “დრუჟბას” ნავთობსადენის გავლით ნავთობი უნგრეთს მიეწოდება, მომხდარის შედეგად კი, ეს პროცესი შეწყდა. აღნიშნულს ეხმიანება უნგრეთის საგარეო საქმეთა მინისტრი, პიტერ სიიარტო და უკრაინის ქმედება შეაფასა, როგორც “უნგრეთის ომში ჩათრევის მცდელობა”.
“ნავთობსადენ „დრუჟბაზე“ კვლავ განხორციელდა თავდასხმა – მოკლე დროში მესამედ. უნგრეთში ნავთობის მიწოდება კვლავ შეჩერდა. ეს არის კიდევ ერთი თავდასხმა ჩვენი ენერგეტიკული უსაფრთხოების წინააღმდეგ, ომში ჩვენი ჩათრევის კიდევ ერთი მცდელობა. ეს წარმატებული ვერ იქნება!“, – აცხადებს სიიარტო.
-
მისი მტკიცებით, უნგრეთი მტკიცედ დაიცავს საკუთარ ეროვნულ ინტერესებს.
“გავაგრძელებთ მშვიდობისკენ მიმართული ყველა ძალისხმევის მხარდაჭერას, ამავდროულად, მტკიცედ დავიცავთ უნგრეთის ეროვნულ ინტერესებს“, – აცხადებს პიტერ სიიარტო.
ცნობისთვის, “უნეჩას” ნავთობტერმინალი, “დრუჟბას” ნავთობსადენის სისტემის უდიდესი კვანძია. სადგურის მთავარი ფუნქციაა ნავთობის ტრანსპორტირება დაახლოებით 9000 კმ სიგრძის მილსადენის სისტემით.
აღსანიშნავია, რომ ეს არ არის პირველი შემთხვევა, როდესაც აღნიშნულ ნავთობსადენზე უკრაინელების შეტევა განხორციელდა.
12-13 აგვისტოს უკრაინის თავდაცვის დაზვერვის მიერ მართული კამიკაძე დრონები თავს დაესხნენ “დრუჟბას” ნავთობსადენის სადგურს “უნეჩას”, შეტევა განხორციელდა17-18 აგვისტოსაც. შედეგად ობიექტზე ხანძარი გაჩნდა და “დრუჟბას” მილსადენიდან ნავთობის გადატუმბვა მთლიანად შეჩერდა.
მოგვიანებით, რუსებმა განაცხადეს, რომ ტერმინალი შეაკეთეს და ჩვეულებრივ განაგრძობდა მუშაობას.
