აშშ-ის პრეზიდენტი დონალდ ტრამპი აცხადებს, რომ უახლოეს მომავალში რუსეთის პრეზიდენტ ვლადიმერ პუტინთან საუბარს გეგმავს.
როგორც ტრამპმა აღნიშნა, „ბევრი ომი მოაგვარა“, მაგრამ რუსეთ-უკრაინის კონფლიქტი ყველაზე რთული აღმოჩნდა.
„დიახ, ვისაუბრებ. ჩვენ ძალიან კარგი დიალოგი გვაქვს. მე შვიდი ომი მოვაგვარე. ის, რაც მარტივი მეგონა, აღმოჩნდა, რომ ცოტა უფრო რთულია. მეგონა, უფრო ადვილი უნდა ყოფილიყო პუტინთან, უკრაინასთან ჩემი დამოკიდებულების გამო და სხვა ყველაფრის გამო“, – აღნიშნა ტრამპმა.
აშშ-ის პრეზიდენტის თქმით, რუსეთ-უკრაინის ომში მიმდინარე კვირაში 7 014 ადამიანი დაიღუპა, ძირითადად, ჯარისკაცები.
„ისინი ისეთი მასშტაბით იღუპებიან, როგორიც მეორე მსოფლიო ომის შემდეგ არ გვინახავს. ისინი არ არიან ამერიკელები, მაგრამ ისინი ადამიანები არიან. იცით, მე სამი ომი მოვაგვარე. ერთი 31 წელი გრძელდებოდა, იქ ბევრი ადამიანი დაიღუპა, 10 მილიონი ადამიანი, კიდევ ერთი, სადაც ომი 37 წელი გრძელდებოდა და ხალხი ამბობდა, რომ მათი მოგვარება შეუძლებელი იყო. მე კი მოვაგვარე. ეს შემთხვევა ამაზე უფრო რთული აღმოჩნდა, მაგრამ ჩვენ ამასაც მოვაგვარებთ, ჩვენ მოვაგვარებთ“, – განაცხადა ტრამპმა.
