ვილი სანიოლმა თურქეთთან მარცხის შემდეგ რამდენიმე ცვლილება განახორციელა. საქართველოს ტაქტიკური მონახაზი შეცვალა და გუნდი ბულგარეთთან წინააღმდეგ 4–3–3 ფორმაციით გამოვიდა. (თურქეთთან შეხვედრა საქართველოს ნაკრებმა 4–4–2 ტაქტიკით ჩაატარა).
სანიოლმა გამოცვალა ორი ფეხბურთელი. პირველ რიგში, გურამ კაშია, რომელმაც ძალიან მძიმედ ჩაატარა წინა შეხვედრა და მის ნაცვლად ცენტრში ლუკა ლოჩოშვილი დააყენა, მის ადგილას კი, მარცხენა მცველის პოზიციაზე აზაროვი გამოიყვანა. გარდა ამისა, გიორგი წიტაიშვილი, რომელმაც არაეფექტურად ითამაშა თურქეთის წინააღმდეგ ჩაანაცვლა ნიკა გაგნიძით.
საქართველოს დიდი ხანია არ ჩაუტარებია მსგავსი დომინანტური მატჩი. ჯვაროსნები პირველივე წუთიდან აკონტროლებდნენ ბურთს და მთლიანად თამაშის ტემპს, თუმცა უნდა აღინიშნოს, რომ პირველ წუთებში ბულგარელებს ჰქონდათ ანგარიშის გახსნის შანსი, რომ არა მარადაშვილის გასაოცარი რეაქცია, შესაძლოა მატჩის ბედი სულ სხვაგვარად წარმართულიყო.
პირველ ტაიმში საქართველოს 69% ჰქონდა ბურთის ფლობა და ჯვაროსნებმა ბულგარელები, აბსოლუტურად, მიაჯაჭვეს თავიანთ ნახევარს. 30-ე წუთზე, ხვიჩა კვარაცხელიამ თავის სტილში გაიტანა პირველი გოლი და ნაკრები დააწინაურა. 44–ე წუთზე კი ზურიკო დავითაშვილის ასისტით ნიკა გაგნიძემ 2–0–მდე გაზარდა საქართველოს უპირატესობა.
არც მეორე ნახევარში დაუტოვეს შანსი ქართველებმა მეტოქეს. ბულგარეთი ისევე ვერ ქმნიდა ვერანაირ საგოლე მომენტს და საქართველოს სრული უპირატესობის დასტური გახდა მესამე გოლი. ბულგარელთა მეკარემ ქოჩორაშვილის დარტყმა ნორმალურად ვერ დაამუშავა, მისი შეცდომით მიქაუტაძემ ისარგებლა და საქართველოს საკვალიფიკაციო ეტაპზე პირველი ქულები გაუნაღდა.
ეს 3 ქულა საქართველოს ნაკრებისთვის უმნიშვნელოვანესია, რადგან მსოფლიო ჩემპიონატის საკვალიფიკაციო ეტაპზე საკმაოდ ძლიერ ჯგუფში ვართ და თითოეულ ქულას შესაძლოა ოქროს ფასი ჰქონდეს.
თანაც ერთ თვეში საქართველოს წინ ორი უმძიმესი გასვლითი თამაში ელის, 11 ოქტომბერს ამჟამინდელი ევროპის ჩემპიონის, ესპანეთის ნაკრებისა და 14 ოქტომბერს თურქეთის წინააღმდეგ.
აღსანიშნავია, რომ მას მერე, რაც ესპანეთმა თურქეთი გასვლაზე გამანადგურებელი ანგარიშით 0:6 დაამარცხა, საქართველოს ჯგუფში მეორე ადგილს იკავებს.
-
როგორი შეფასებები მიიღეს ქართველმა ფეხბურთელებმა?
ჩვენი გუნდის ფეხბურთელების თამაში ანალიტიკურმა საიტებმა შეაფასეს.
Whoscored: მამარდაშვილი 6.9, აზაროვი 7.0, გოგლიჩიძე 7.1, ლოჩოშვილი 6.5, კაკაბაძე 7.2, ქოჩორაშვილი 7.3, მექვაბიშვილი 7.2, გაგნიძე 7.6, კვარაცხელია 9.0, დავითაშვილი 7.0, მიქაუტაძე 8.0, მამუჩაშვილი 6.2, გულიაშვილი 5.8, ლობჟანიძე 6.2, ზივზივაძე 6.2, ლომინაძე 6.4.
Sofascore: მამარდაშვილი 7.1, აზაროვი 7.7, გოგლიჩიძე 7.1, ლოჩოშვილი 7.0, კაკაბაძე 7.4, ქოჩორაშვილი 7.4, მექვაბიშვილი 7.3, გაგნიძე 7.5, კვარაცხელია 8.5, დავითაშვილი 7.3, მიქაუტაძე 7.6, მამუჩაშვილი 6.8, გულიაშვილი 5.7, ლობჟანიძე 6.7, ზივზივაძე 6.6, ლომინაძე 6.9.
Flashscore: მამარდაშვილი 7.1, აზაროვი 7.5, გოგლიჩიძე 7.1, ლოჩოშვილი 6.7, კაკაბაძე 7.1, ქოჩორაშვილი 7.6, მექვაბიშვილი 7.2, გაგნიძე 7.6, კვარაცხელია 8.5, დავითაშვილი 7.5, მიქაუტაძე 7.6, მამუჩაშვილი 6.6, გულიაშვილი 5.7, ლობჟანიძე – შეფასების გარეშე, ზივზივაძე 6.6, ლომინაძე – შეფასების გარეშე.
რა თქვეს მწვრთნელებმა მატჩის შემდეგ?
- “კვარაცხელია ფანტასტიკური მოთამაშეა”
ბულგარეთის ნაკრების მთავარი მწვრთნელი ილიან ილიევი:
“სტარტი უკეთესი გვქონდა, ვიდრე შემდეგ ვითამაშეთ. საქართველოს ნაკრებმა თურქეთთან წააგო და ვიცოდით, უფრო მოინდომებდნენ. შეიძლება ითქვას, მეტოქეს 2 გოლი ვაჩუქეთ. საქართველოს სახით საქმე ძალიან ძლიერ გუნდთან გვაქვს. არიან ფეხბურთელები, რომელთაც არ შეუძლიათ, ძალები სწრაფად აღიდგინონ და შეცვლები ამიტომ იყო.
კვარაცხელია ფანტასტიკური მოთამაშეა, დღესაც დიდებული იყო. ბულგარეთში გვყავდა ამ დონის ფეხბურთელები, სამწუხაროდ, ახლა არ არიან და იმედია, მომავალში გამოჩნდებიან.
საკვალიფიკაციო ეტაპზე არიან გუნდები, რომლებიც უკეთ იწყებენ. გვესმის, ჯგუფში უფრო კვალიფიციური მეტოქეები გვყავს, ვსწავლობთ. კონკრეტული ეპიზოდები ბევრს წყვეტს. დღეს საგოლე ეპიზოდი გვქონდა, მაგრამ თქვენმა მეკარემ ბურთი მოიგერია, შემდეგ კი აქეთ გავუშვით”.
- “კაშიას დიდი პატივისცემა…”
საქართველოს ნაკრების მთავარი მწვრთნელის ვილი სანიოლის მისმა თანაშემწე, ზურაბ ხიზანიშვილი:
“განსხვავებული მატჩი ვიხილეთ. ბიჭებს მადლობა, მათ ძალები სწრაფად აღიდგინეს და ჩვენი დავალებები ზუსტად გავითავისეთ. დიდი მადლობა მამარდაშვილს, მან დასაწყისში 99-პროცენტიანი გოლი არ გაუშვა და ამან დიდი როლი შეასრულა.
კაშიას დიდი პატივისცემა. ყველასთან გვქონდა საუბარი, ვინ თავს როგორ გრძნობდა და აქედან გამომდინარე, მისი ართამაში სანიოლის გადაწყვეტილება იყო. გურამი დიდი პროფესიონალია, 38 წლისაა და ეს გადაწყვეტილება ისე მიიღო, როგორც უნდა მიეღო.
ლომინაძე დებიუტანტი იყო და თამაშში ძალიან კარგად ჩაერთო, დიდი პერსპექტივა აქვს. კაკაბაძის ინდივიდუალური შეცდომებიც ფეხბურთის ნაწილია. გოგლიჩიძე როცა ნაკრებში მოვიდა, ყველა ძალიან მოვიხიბლეთ – სწრაფი, მებრძოლი. ის უკეთეს გუნდში გადავიდა, იტალიის ჩემპიონატს თამაშობს და მომავალში ჩვენი დაცვის ლიდერი იქნება.
ვიცე-კაპიტნები კიტეიშვილი, კვარაცხელია და კაკაბაძე არიან. სამკლავური ვის ექნება, ეგ გადამწყვეტი არაა. ჩვენ ლიდერები გვჭირდება.
ვერ ვიტყვით, რომ პრობლემები არ არსებობს, ოქტომბერში უფრო მეტს დავინახავთ. მაქსიმალისტობა კარგია, მაგრამ ყველაფერი რეალურად უნდა შევაფასოთ. დღეს საუკეთესო ალბათ, ნიკა გაგნიძე იყო, ძალიან მაგარი მატჩი ჰქონდა, თუ დააკვირდებით, გუნდში დიდ როლს თამაშობს.
გადამწყვეტი მაინც სწრაფი შეტევები იყო. ბულგარეთის ნაკრები გავწელეთ, შეტევაში წარმატებული როტაციები იყო”.
- სტატიაში გამოყენებულია sportall.ge-ს მასალები
