ნუ ხარ ცუდ ხასიათზე, – ამ სიტყვებით ეკონომიკისა და მდგრადი განვითარების მინისტრის ყოფილმა მოადგილემ, რომეო მიქაუტაძემ სხდომათა დარბაზში მყოფ მეუღლეს, ნინო მიქაუტაძეს მიმართა.
“გადასარევ ხასიათზე ვარ, ამ დღეზე ვოცნებობდი”,- მიმართა მას ნინო მიქაუტაძემ.
- მოსამართლე ლელა კალიჩენკომ სხდომათა დარბაზში მყოფ პირებს მიმართა, რომელთაგანაც ერთ-ერთმა ფოტო გადაიღო. მან განმარტა, რომ ბრალდებულის ოჯახის წევრებს მისცა საშუალება, მიქაუტაძეს მისალმებოდნენ, ამით კი დამსწრეებს ბოროტად არ უნდა ესარგებლათ.
“მთავარი მაინც მე ვარ და მე გიხდით მადლობას”,- მიმართა მას მიქაუტაძემ.
მოსამართლე ლელა კალიჩენკოს მიერ დაკავებულისთვის მისი უფლებების განმარტებისას გახდა ცნობილი, რომ მიქაუტაძეს 9 ბრალდება აქვს წაყენებული.
ამასთან, მოსამართლის კითხვაზე, ცნობდა თუ არა ის თავს დამნაშავედ, მიქაუტაძემ უპასუხა, რომ ის “თავს დამნაშავედ არ ცნობს”.
დღესვე ცნობილი გახდა, რომ მიქაუტაძეს ახალი ბრალდებები დაემატა. პროკურორი ირაკლი მარშანია განმარტავს, რომ თუკი აქამდე, მიქაუტაძეს ბრალი წარდგენილი ჰქონდა 3 მლნ ლარის ოდენობის უკანონო შემოსავლის ლეგალიზებასთან დაკავშირებით, ახლა გამოძიება მას დაახლოებით, 8.4 მლნ ლარის ოდენობის უკანონო შემოსავლის ლეგალიზაციას ედავება.
“თავდაპირველად, როცა გამოძიება დაიწყო, შესაბამისი მუხლებით იქნა წარდგენილი ბრალდება, რაც თქვენთვის ცნობილია. გამოძიების მიმდინარეობის დროს გამოიკვეთა კონკრეტული ახალი ეპიზოდები, რომელიც ჩაიდინა რომეო მიქაუტაძემ. კერძოდ, დაემატა ის, რომ ბრალი წარედგინა სამსახურებრივი უფლებამოსილების ბოროტად გამოყენების ფაქტზე, რამდენიმე ეპიზოდი. ასევე, უკანონო შემოსავლის ლეგალიზაციის კუთხით დამძიმდა ბრალდება, გაიზარდა ოდენობა. წარდგენილი იყო 3 მლნ-სთან დაკავშირებით ბრალი და გამოძიებით დადასტურდა, რომ მან განახორციელა უკანონო შემოსავლის ლეგალიზაცია დაახლოებით, 8.4 მლნ-ის. გარდა ამისა, დადგინდა, რომ რომეო მიქაუტაძემ, მაშინ როდესაც მუშაობდა სახელმწიფო სტრუქტურებში, ამავდროულად, მიუხედავად იმისა, რომ კანონით აკრძალული ჰქონდა, მონაწილეობას იღებდა სამეწარმეო საქმიანობაში.
ან დააარსა რამდენიმე კომპანია, ასევე, მართავდა ამ კომპანიებს და წილები ჰქონდა კერძო კომპანიებში. ეს კომპანიები დაკავშირებული იყო ჰესებთან. ეხმარებოდა ამ კომპანიებს, ვინაიდან დაინტერესება ჰქონდა, სხვადასხვა ნებართვების აღებაში. მაგალითად, როცა კომპანია არის ახალი, მისი ღირებულებაა დაბალი, მაგრამ როცა მოიპოვებს სხვადასხვა ნებართვებს, სხვადასხვა უწყებებიდან, მოიპოვებს მაგალითად ჰესის მშენებლობის ნებართვას და ა.შ, ამ კომპანიის წილის ღირებულება მაქსიმალურად იზრდება. აღნიშნულთან დაკავშირებით დაზუსტდა ეს ბრალი.
გამოძიება გრძელდება და მომავალში რას დაადგენს, ვნახავთ. ვერსიებთან დაკავშირებით, ასევე ვინ როგორ არის დაბარებული გამოძიებაში, აღნიშნულთან დაკავშირებით ვერ ვისაუბრებ. უბრალოდ, იმას ვიტყვი, რომ გამოყოფილია საქმე და ყველა ვერსია გადამოწმდება. ყველა ქონება რაც გამოძიებამ მოიძია, დაყადაღებულია და საქმეშიც არის. საქმეში არის მასალები, სადაც დაფიქსირებულია, რომ ოჯახის წევრები, ოჯახთან დაკავშირებული პირები, რომეო მიქაუტაძესთან დაკავშირებული პირები, კომპანიები, რომელშიც ფიგურირებს რომეო მიქაუტაძის და მისი ოჯახის წევრების წილები, არის დაყადაღებული. მათ შორის, ესპანეთის სახლიც. რომეო მიქაუტაძე მუშაობდა ენერგეტიკის მინისტრის მოადგილედ, ეკონომიკის მინისტრის მოადგილედ, „თბილსერვისის ჯგუფის“ უფროსად და ამ პერიოდში ახდენდა ამ დანაშაულების ჩადენას“, – განაცხადა ირაკლი მარშანიამ.
რომეო მიქაუტაძე კვლავ პატიმრობაში რჩება. აღნიშნული გადაწყვეტილება თბილისის საქალაქო სასამართლოს მოსამართლემ ლელა კალიჩენკომ მიიღო. მისივე გადაწყვეტილებით საქმე არსებითად განსახილველად სასამართლოს გადაეცა.
დღევანდელ სხდომაზე მტკიცებულებების დასაშვებობაზე იმსჯელეს. ასევე, გადაისინჯა დაკავებულის მიმართ შეფარდებული აღკვეთის ღონისძიება პატიმრობა და ის ძალაში დარჩა.
ბრალდების მხარე დაკავებულის კვლავ პატიმრობაში დარჩენას ითხოვდა, დაცვის მხარე კი მიქაუტაძის 100 000-ლარიანი გირაოს სანაცვლოდ გათავისუფლებას ითხოვდა. ამასთან, ადვოკატი დამატებითი შემზღუდავი ღონისძიებების გამოყენებას ითხოვდა, მათ შორის, შინაპატიმრობის გამოყენებას.
ცნობისთვის, პროკურატურის ბრალის მიხედვით, რომეო მიქაუტაძე სისტემატურად ბოროტად იყენებდა სამსახურებრივ უფლებამოსილებას, რასაც თან ახლდა განსაკუთრებით დიდი ოდენობით შემოსავლის მიღება.
კერძოდ კი, ბრალდებულმა მასთან დანაშაულებრივ კავშირში მყოფი პირების დახმარებით განსაკუთრებით დიდი ოდენობით შემოსავლის 2 556 192 ლარის უკანონო დაუსაბუთებელი ლეგალიზაცია განახორციელა.
სამართალდამცველებმა ეკონომიკის და მდგრადი განვითარების მინისტრის ყოფილი პირველი მოადგილე 20 ივნისს დააკავეს. მას ბრალდება საქართველოს სისხლის სამართლის კოდექსის 332-ე მუხლის მე-2 ნაწილით და 194-ე მუხლის მე-3 ნაწილის “გ“ ქვეპუნქტით წარედგინა, რაც სასჯელის სახედ და ზომად 12 წლამდე პატიმრობას ითვალისწინებს.
