ემანუელ მაკრონმა საფრანგეთის პრემიერ-მინისტრის თანამდებობაზე სებასტიან ლეკორნუ ხელახლა დანიშნა, – ინფორმაციას CNN-ი საფრანგეთის პრეზიდენტის ადმინისტრაციაზე დაყრდნობით ავრცელებს.
“რესპუბლიკის პრეზიდენტმა ბატონი სებასტიან ლეკორნუ პრემიერ-მინისტრად დანიშნა და მას მთავრობის ფორმირება დაავალა“, – ნათქვამია ელისეის სასახლის განცხადებაში.
- ლეკორნუმ, რომელმაც პრემიერ-მინისტრის თანამდებობა მიმდინარე კვირის დასაწყისში დატოვა, განაცხადა, რომ საფრანგეთში პოლიტიკური კრიზისი უნდა დასრულდეს.
“ეს პოლიტიკური კრიზისი და არასტაბილურობა, რომელიც ზიანს აყენებს საფრანგეთის ინტერესებს უნდა დავასრულოთ”, – აღნიშნა ლეკორნუმ.
შეგახსენებთ, საფრანგეთში პოლიტიკური კრიზისი 6 ოქტომბერს გამწვავდა, როდესაც ახლად დანიშნულმა პრემიერ-მინისტრმა სებასტიან ლეკორნუმ თანამდებობა დატოვა. თანამდებობიდან გადადგომის შემდეგ საფრანგეთის პრეზიდენტმა, ემანუელ მაკრონმა ლეკორნუს პოლიტიკური კრიზისიდან გამოსვლის მიზნით სხვადასხვა პარტიებთან მოლაპარაკებების გამართვა დაავალა. პრემიერ-მინისტრის თანამდებობაზე ლეკორნუს ხელახლა დანიშვნამდე მაკრონი პარლამენტში წარმოდგენილი პარტიების ლიდერებს შეხვდა.
რატომ გადადგა ლეკორნიუ?
მთავარი მიზეზი იგივეა, რაც ადრე. 2024 წლის ზაფხულში – ულტრამემარჯვენე “ეროვნული გაერთიანების“ გამარჯვების შემდეგ, ემანუელ მაკრონმა გადაწყვიტა ეროვნული ასამბლეის დაშლა და ახალი არჩევნების დანიშვნა. მას შემდეგ საფრანგეთი პოლიტიკურ კრიზისში იმყოფება, რომლის დასასრული არ ჩანს. 2024 წლის ივლისში მაკრონის პროტეჟემ, გაბრიელ ატალმა, პრემიერ-მინისტრის თანამდებობა დატოვა (ის ფაქტობრივად სექტემბრამდე ხელმძღვანელობდა მთავრობას). 2024 წლის სექტემბრის დასაწყისში იგი მემარჯვენე რესპუბლიკური პარტიის წარმომადგენელმა მიშელ ბარნიემ შეცვალა. ზუსტად ორი თვის შემდეგ, ბარნიემ თანამდებობა დატოვა ეროვნული ასამბლეისგან უნდობლობის გამოცხადების შემდეგ.
ბარნიეს შემდეგ ყველა პარტიისთვის ყველაზე კომპრომისული კანდიდატი ფრანსუა ბაირუ მოვიდა. ის თანამდებობას მიმდინარე წლის სექტემბრამდე იკავებდა: ბაირუმ ბიუჯეტის კანონპროექტის მიღება ვერ შეძლო და პარლამენტში მისი მთავრობისთვის უნდობლობის გამოცხადების საკითხი წამოიწყო.
შემდეგ, როდესაც მაკრონმა ყველა შესაძლო კანდიდატს შორის სებასტიან ლეკორნიუ აირჩია, მის გადაწყვეტილებაზე რეაქცია საკმაოდ რბილი იყო. პოლიტიკოსებმა და ჟურნალისტებმა განაცხადეს, რომ ამჯერად პრეზიდენტმა გადაწყვიტა, თავად ეხელმძღვანელა მთავრობისთვის: ლეკორნიუ მაკრონის ერთ-ერთ ყველაზე ერთგულ მოკავშირედ ითვლება, რომელიც ყველაფერში მის ნებას მიჰყვება.
ყოფილი პრემიერის განცხადებით, როგორც მოკავშირეები ისე მოწინააღმდეგეები მის მთავრობას დამხობით დაემუქრნენ. ეს კი ნიშნავდა რომ “ის დაკისრებულ მოვალეობას ვერ ასრულებდა“.
2022 წელს, ემანუელ მაკრონის მეორე ვადით არჩევის შემდეგ, საფრანგეთის პოლიტიკა უფრო და უფრო არასტაბილური ხდება — არც ერთ პოლიტიკურ ჯგუფს აღარ გააჩნია საპარლამენტო უმრავლესობა, გასულ წელს, მაკრონის მიერ მიღებულმა გადაწყვეტილებამ დაენიშნა ვადამდელი არჩევნები, კრიზისი კიდევ უფრო გააღრმავა.
როგორი იყო საფრანგეთის პოლიტიკური ძალების რეაქცია მთავრობის გადადგომაზე?
პოლიტიკურმა ძალებმა, ძირითადად, მაკრონი გააკრიტიკეს იმის გამო, რომ ვერ უზრუნველყო მის მიერ პროვოცირებული პოლიტიკური კრიზისიდან გამოსვლა.
რადიკალური პოლიტიკური ძალების პოზიცია არ შეცვლილა. ულტრამემარცხენე “უძლეველი საფრანგეთის“ ლიდერი ჟან-ლუკ მელანშონი მაკრონის დაუყოვნებლივ გადადგომას ითხოვს.
